बॉलिवूडमधील प्रसिद्ध अभिनेते आणि दिग्दर्शक यशपाल शर्मा यांचे भाऊ यांना हिसार येथून लाच स्वीकारल्याप्रकरणी अटक करण्यात आली आहे. यानंतर इंडस्ट्रीत एकच खळबळ उडाली आहे. 3,000 रुपयांची लाच स्वीकारल्याप्रकरणी हरियाणा लाचलुचपत प्रतिबंधक विभागाने (ACB) ही कारवाई केली आहे. यशपाल शर्मा यांचे भाऊ हे हरियाणाच्या ‘जल सेवा मंडळ’ विभागात जिल्हास्तरीय अधिकारी म्हणून कार्यरत आहेत.
नेमकं प्रकरण काय?
मिळालेल्या माहितीनुसार, आर्य नगर येथील रहिवासी राजेश कुमार यांनी या प्रकरणी तक्रार दाखल केली होती. त्यांच्या गावाजवळ राजगड-चंदीगड हायवे नजीकच्या शेतजमिनीवर एक कॉलनी उभारण्यात आली होती. या कॉलनीच्या शेतीसाठी कॅनॉलच्या पाण्याने सिंचन व्यवस्था मिळावी, यासाठी ‘कमांड एरिया ऑथोरायझेशन’ मिळवण्यासाठी हिसार येथील कालवा विभागात अर्ज करण्यात आला होता. या अर्जाला मंजुरी देण्याची जबाबदारी अधिकारी म्हणून यशपाल शर्मा यांच्या भावाकडे होती. यावेळी त्यांनी ही परवानगी देण्यासाठी तक्रारदाराकडे 3,000 रुपयांची लाच मागितली होती.
सापळा रचून केली अटक
तक्रारदाराच्या अर्जाची पडताळणी केल्यानंतर, एसीबीच्या हिसार पथकाने स्वतंत्र पंचांच्या उपस्थितीत एक सापळा रचला. नियोजित योजनेनुसार, जेव्हा तक्रारदार 3,000 रुपयांची रक्कम त्यांना देण्यास गेला, तेव्हा एसीबीच्या पथकाने त्यांना लाचेची रक्कम स्वीकारताना रंगेहात पकडले. त्यानंतर अधिकाऱ्यांनी लाचेची ही रक्कम घटनास्थळावरून जप्त केली.
गुन्हा दाखल आणि पुढील तपास सुरू
लाचलुचपत प्रतिबंधक कायदा, 1988 च्या कलम 7 अंतर्गत गुन्हा दाखल करण्यात आला असून त्यांना ताब्यात घेण्यात आले आहे. या प्रकरणी एसीबीचे पथक अधिक तपास करत असून यात आणखी कोणाचा सहभाग आहे का, याचाही शोध घेतला जात आहे. यशपाल शर्मा यांच्या भावालाच लाचखोरी प्रकरणात अटक झाल्याने सरकारी वर्तुळात आणि चित्रपटसृष्टीत मोठी खळबळ उडाली आहे.
