Central Railway: आता दिवाळी, छठपूजेसाठी मध्य रेल्वेच्या स्पेशल 418 गाड्या धावणार; गाड्यांचे वेळापत्रक जाणून घ्या….

गणेशोत्सवानंतर अनेक चाकरमानी ऑक्टोबर/नोव्हेंबर महिन्यात दिवाळीसाठी जाताना दिसतात. त्यात या महिन्यात छठपूजा हा पारंपरिक सण देखील येत असल्यामुळे रेल्वे प्रवाशांची मोठी गर्दी पाहायला मिळते. ही वाढती गर्दी लक्षात घेऊन मध्य रेल्वेने विविध मार्गावर 418 विशेष गाड्या चालविण्याची घोषणा केली आहे. मुंबई, पुणे, नागपूर आणि कोल्हापूरसह विविध स्थानकांहून उत्तर भारत, दक्षिण भारताच्या गाड्यांचा समावेश आहे.

आरक्षण सुरू

काही विशेष गाड्यांचे आरक्षण 27 सप्टेंबरपासून, तर उर्वरित गाड्यांचे आरक्षण 28 सप्टेंबरपासून संगणकीकृत आरक्षण केंद्रांवर सुरू होईल. प्रवाशांना IRCTCची वेबसाईट तसेच RailOne App द्वारे तिकीट बुक करता येणार आहे. तर जनरल डब्यांसाठी UTS ॲपद्वारे सामान्य दराने तिकिटे उपलब्ध असणार आहेत.

कोणत्या विशेष गाड्या सुटणार?

1. सीएसएमटी-गोरखपूरसाठी 16 ऑक्टोबर ते 16 नोव्हेंबर या कालावधीत रोज विशेष गाडी धावणार आहे. सीएसएमटीहून रात्री 10.30 वाजता ही गाडी सुटणार आहे.
2. सीएसएमटी-लातूर यादरम्यान 13 ऑक्टोबर ते 24 नोव्हेंबर या कालावधीत दर मंगळवार आणि गुरुवारी विशेष गाडी चालविण्यात येणार आहे.
3. सीएसएमटी-नागपूर यादरम्यान 17 ऑक्टोबर ते 21 नोव्हेंबरदरम्यान दर शनिवारी सुपरफास्ट विशेष गाडी धावेल.
4. सीएसएमटी-कोल्हापूर यादरम्यान 15 ऑक्टोबर ते 19 नोव्हेंबरदरम्यान दर गुरुवारी विशेष गाडी उपलब्ध असेल.