Actress shocking revelation: ‘बिग बॉस १७’मुळे घराघरात पोहोचलेली अभिनेत्री आयेशा खान पुन्हा एकदा चर्चेत आली आहे. मात्र यावेळी कारण तिचा एखादा प्रोजेक्ट किंवा गाणं नसून, तिने केलेला धक्कादायक खुलासा आहे. सार्वजनिक जीवनात महिलांना कोणत्या प्रकारच्या मानसिक आणि लैंगिक त्रासाला सामोरं जावं लागतं, याबद्दल आयेशाने अत्यंत स्पष्टपणे भूमिका मांडली आहे.
एका सार्वजनिक कार्यक्रमात बोलताना तिने सोशल मीडियावर होणाऱ्या अश्लील कमेंट्स, ट्रोलिंग आणि दररोज मिळणाऱ्या बलात्काराच्या धमक्यांबद्दल सांगितलं. “मी फोन उघडला तर अशा प्रकारच्या मेसेजेसचा वर्षाव दिसतो,” असं ती म्हणाली. सार्वजनिक व्यक्तिमत्त्व असल्यामुळे महिलांना अशा प्रकारच्या संदेशांचा सामना करावा लागतो, ही अत्यंत दुर्दैवी बाब असल्याचं तिने नमूद केलं.
आयेशा सांगते, कपडे कोणते घालायचे याचाही विचार अनेकदा भीतीपोटी करावा लागतो. साधा ड्रेस घातला तरी टीका होते आणि ग्लॅमरस लूक घेतला तरी वाद निर्माण होतात. “एखादी पोस्ट करण्यापूर्वी दहा वेळा विचार करावा लागतो. लोक काय म्हणतील, कोणत्या प्रकारे चुकीचा अर्थ काढतील, ही भीती सतत मनात असते,” असं ती स्पष्ट करते. या सगळ्या प्रकारामुळे मानसिक तणाव वाढत असल्याचंही तिने मान्य केलं.
तिच्या आयुष्यातील सर्वात धक्कादायक अनुभवाबद्दल बोलताना आयेशा भावूक झाली. “माझ्यावर बलात्काराचा प्रयत्न झाला होता,” असा खुलासा करताना ती काही क्षण थांबली. त्या घटनेबद्दल अधिक तपशील देण्याचं तिने टाळलं, मात्र त्या आठवणी अजूनही तिला अस्वस्थ करतात, असं तिने सांगितलं. ऑनलाइन मिळणाऱ्या धमक्या या जुन्या जखमा पुन्हा ताज्या करतात, असंही ती म्हणाली.
चित्रपटाच्या शूटिंगदरम्यान घडलेला आणखी एक प्रसंगही तिने सांगितला. एका प्रोजेक्टच्या सेटवर असताना तिला सोशल मीडियावरून वारंवार व्हॉइस नोट्स येत होत्या. तपास केल्यावर संबंधित व्यक्ती ही सेटवर काम करणारीच असल्याचं समोर आलं. या घटनेनंतर तिने तात्काळ कुटुंबीय आणि निर्मिती पथकाकडे तक्रार केली. त्यानंतर संबंधितावर कारवाई करण्यात आली. मात्र या घटनेने ती खूप हादरली होती.
आयेशा खानने आपल्या अनुभवांद्वारे इंडस्ट्रीतील महिलांना भेडसावणाऱ्या समस्यांकडे लक्ष वेधलं आहे. प्रसिद्धीच्या झोतात असलेल्या महिलांनाही सुरक्षिततेचा आणि सन्मानाचा हक्क आहे, हे तिने ठामपणे सांगितलं. सोशल मीडियावर ट्रोलिंग आणि लैंगिक स्वरूपाच्या धमक्या देणाऱ्यांविरोधात कठोर कारवाई होणं आवश्यक असल्याचं मतही तिने व्यक्त केलं.
तिच्या या वक्तव्यानंतर सोशल मीडियावर विविध प्रतिक्रिया उमटत आहेत. काहींनी तिच्या धैर्याचं कौतुक केलं, तर काहींनी अशा प्रकारच्या वर्तनावर कठोर कायदेशीर कारवाईची मागणी केली. एकूणच, आयेशा खानच्या या खुलाशाने पुन्हा एकदा मनोरंजन क्षेत्रातील महिलांच्या सुरक्षिततेचा मुद्दा ऐरणीवर आला आहे