Hindu Temple In Iran: बॉलीवूडचे ‘शहेनशाह’ अमिताभ बच्चन हे सामाजिक माध्यमांवर नेहमीच काहीतरी वेगळे आणि विचार करायला लावणारे शेअर करत असतात, ज्यामुळे अनेकदा चाहते थक्क होतात. मात्र, नुकतीच त्यांनी आपल्या अधिकृत खात्यांवरून केलेली एक पोस्ट सध्या जगभरात कौतुकाचा विषय ठरली आहे. अनेक युजर्स या पोस्टला अमिताभ यांची या वर्षातील सर्वात उत्कृष्ट आणि माहितीपूर्ण पोस्ट मानत आहेत. अमिताभ बच्चन यांनी थेट इराणमधून एका 134 वर्षे जुन्या प्राचीन हिंदू विष्णू मंदिराचा अतिशय सुंदर आणि दुर्मिळ व्हिडिओ शेअर केला आहे. या नयनरम्य फुटेजच्या माध्यमातून त्यांनी भारत आणि इराण यांच्यातील शतकानुशतके जुन्या सांस्कृतिक आणि ऐतिहासिक संबंधांना उजाळा दिला आहे.
त्रिवेणी प्लॅटफॉर्मवर व्हिडिओ व्हायरल
अमिताभ बच्चन यांनी हा दुर्मिळ व्हिडिओ केवळ ‘X’ (पूर्वीचे ट्विटर) वरच नव्हे, तर त्यांच्या फेसबुक आणि इंस्टाग्राम प्रोफाइलवरही शेअर केला आहे. हा व्हिडिओ समोर आल्यापासून त्यांच्या सर्व सोशल मीडिया अकाऊंट्सवर कमेंट्सचा महापूर आला आहे. फेसबुकवर तर चाहत्यांनी या पोस्टला या वर्षातील सर्वोत्तम पोस्ट म्हणून घोषित केले आहे. या प्राचीन मंदिराची भव्यता आणि त्यामागील इतिहास पाहून नेटकरी कमालीचे प्रभावित झाले आहेत.
‘बंदर अब्बास’ येथील वास्तुकला
या प्राचीन विष्णू मंदिराची माहिती देताना अमिताभ बच्चन यांनी लिहिले की, हे मंदिर इराणच्या ‘बंदर अब्बास’ या शहरात स्थित आहे. कजार राजवटीच्या काळात म्हणजेच सन 1892 मध्ये या शहरात राहणाऱ्या भारतीय हिंदू व्यापाऱ्यांच्या सोयीसाठी हे मंदिर उभारण्यात आले होते. या व्हिडिओमध्ये 134 वर्षांपूर्वीची अप्रतिम वास्तुकला, भगवान विष्णूंच्या प्राचीन मूर्ती आणि मंदिरावरील कोरीव काम पाहायला मिळते. विशेष म्हणजे, व्हिडिओच्या एका फ्रेममध्ये ‘राष्ट्रीय संरक्षित कृष्ण मंदिर’ असा फलकही स्पष्ट दिसतो. या व्हिडिओच्या पार्श्वभूमीवर वाजणारी संथ आणि मधुर पर्शियन (इराणी) सुर या संपूर्ण दृश्याला अधिक शांत आणि आध्यात्मिक बनवते.
चाहते गेले भारावून
अमिताभ यांच्या या कौतुकास्पद पोस्टवर प्रतिक्रिया देताना एका चाहत्याने लिहिले, “तुम्ही पहिल्यांदाच इतकी मोलाची आणि अद्भुत माहिती शेअर केली आहे, यासाठी तुम्ही खरोखरच कौतुकास पात्र आहात.” दुसऱ्या एका युझरने लिहिले की, “तुम्ही फक्त एकदा आवाज उठवा, संपूर्ण देश तुमच्या पाठीशी उभा राहील.” बहुतांश युजर्सनी “अखेर एक नंबर पोस्ट!” अशा प्रतिक्रिया देत अमिताभ बच्चन यांच्याबद्दल कृतज्ञता व्यक्त केली आहे.
T 5744(i) – The Ancient Hindu Vishnu Temple in Abbas Bandar, Iran .. Built in 1892 during the Qajar era .. pic.twitter.com/rVYyodojeq — Amitabh Bachchan (@SrBachchan) May 17, 2026
भारत आणि इराणमधील प्राचीन बंध
ऐतिहासिक दृष्टिकोनातून पाहिले तर भारत आणि इराण या दोन्ही देशांमधील संबंध अतिशय जुने आणि खोलवर रुजलेले आहेत. भारताच्या संगीत, कला आणि भाषेवर पर्शियन (इराणी) संस्कृतीचा मोठा प्रभाव आहे. प्राचीन काळापासून हे दोन्ही देश व्यापार, संस्कृती आणि सामायिक परंपरांच्या माध्यमातून एकमेकांशी जोडले गेले आहेत. असेही मानले जाते की, फाळणीपूर्वी भारत आणि इराण यांच्या सीमा एकमेकांना लागून होत्या, ज्यामुळे या दोन्ही देशांमधील सांस्कृतिक देवाणघेवाण अधिक दृढ झाली होती.
