आजपासून फोनवर नाही ऐकू येणार अमिताभ यांचा आवाज; कारण समजताच व्हाल आश्चर्य

चंद्रकांत शिंदे. मुंबई: गेल्या काही महिन्यांपासून प्रत्येक कॉलपूर्वी अमिताभ बच्चन यांच्या आवाजातील कॉलर ट्यून वाजत होती, ज्याचा उद्देश सायबर फसवणूक, फिशिंग आणि ऑनलाइन घोटाळे टाळण्यासाठी लोकांना जागरूक करणे हा होता. परंतु, गेल्या काही काळापासून लोक याला कंटाळले होते आणि ते काढून टाकण्याची मागणी करत होते. यावर भारत सरकारने अखेर सायबर गुन्ह्यांवरील अलर्ट कॉलर ट्यून बंद केली आहे.

नेमकं प्रकरण काय?

सप्टेंबर 2024 मध्ये, सायबर गुन्ह्यांच्या वाढत्या घटना लक्षात घेता केंद्रीय गृह मंत्रालयाच्या भारतीय सायबर गुन्हे समन्वय केंद्राने जागरूकता मोहीम सुरू केली होती. त्यामध्ये अमिताभ बच्चन यांच्या आवाजात 40 सेकंदांचा एक संदेश होता. यामध्ये लोकांना बनावट कॉल, अनोळखी लिंक्स आणि ओटीपी शेअर करण्याच्या धोक्यांबद्दल इशारा देण्यात येत होता. सुरुवातीला या उपक्रमाचे खूप कौतुक झाले, कारण देशात दररोज हजारो लोक सायबर फसवणुकीचे बळी ठरत आहेत. पण, हळूहळू ही कॉलर ट्यून लोकांसाठी डोकेदुखी बनली. 

हेही वाचा: अबब! ‘या’ मंदिरात पडतो केशर आणि चंदनाचा पाऊस

लोकांनी तक्रार केली की प्रत्येक कॉलपूर्वी वाजणारा हा 40 सेकंदांचा संदेश खूप त्रासदायक होता, विशेषतः आपत्कालीन परिस्थितीत. काहींनी तर त्याची आवश्यकता असल्याचा प्रश्न विचारण्यासाठी माहिती अधिकार अर्जही दाखल केला. सरकारने यापूर्वी या कॉलर ट्यूनची वारंवारता दिवसातून 8-10 वेळा वरून फक्त दोनदा कमी केली होती आणि आपत्कालीन कॉल (पोलीस, रुग्णवाहिका, अग्निशमन दल) दरम्यान ती बंद केली जात होती. पण आता ती पूर्णपणे काढून टाकण्यात आली आहे. गेल्या काही महिन्यांपासून, लोक सोशल मीडियावर या कॉलर ट्यूनवर नाराजी व्यक्त करत आहेत. अनेक वापरकर्त्यांनी याला ‘त्रासदायक’ म्हटले आहे, विशेषतः आपत्कालीन कॉल दरम्यान, त्यामुळे विलंब होत होता.

सोशल मीडियावर अमिताभ बच्चन ट्रोल:

Amit ji roxxx ??@SrBachchan#amitabhbachchan #cybercrimeawareness pic.twitter.com/O08VSJ2SZp — RVCJ Movies (@rvcjmovies) June 23, 2025

अलिकडेच, या कॉलर ट्यूनमुळे अमिताभ बच्चन यांना ट्रोलिंगचा सामना करावा लागला. अनेकांनी सांगितलं की, ‘आपत्कालीन परिस्थितीत कॉल उशिरा लागतो आणि हा मेसेज त्रासदायक वाटतो’. त्यामुळे काही युजर्सनी अमिताभ यांना या संदेशासाठी थेट जबाबदार धरलं. या ट्रोलिंगला उत्तर देताना अमिताभ बच्चन यांनी एक्सवर पोस्ट करत लिहिलं होतं की, ‘हो साहेब, मीही त्यांचा चाहता आहे, म्हणून’. अमिताभ बच्चन यांच्या एक्स पोस्टवर एका वापरकर्त्याने कमेंट केलं की, ‘तर फोनवर बोलणं बंद करा भाऊ’. यावर अमिताभ बच्चन यांनी उत्तर दिलं की, ‘सरकारला सांगा भाऊ, त्यांनी आम्हाला जे करायला सांगितलं ते केलं’.