Riteish Deshmukh: मराठी आणि हिंदी चित्रपटसृष्टीत आपल्या अभिनयाचा ठसा उमटवणारा अभिनेता रितेश देशमुख सध्या त्याच्या 'राजा शिवाजी' या भव्य ऐतिहासिक चित्रपटामुळे कमालीचा चर्चेत आहे. या महत्त्वाकांक्षी चित्रपटाच्या दिग्दर्शन आणि अभिनयाची धुरा रितेशने स्वतः सांभाळली असून, प्रेक्षकांकडून त्याला भरभरून दाद मिळत आहे. दरम्यान, महाराष्ट्राचा हा लाडका अभिनेता सध्या एका वेगळ्याच कारणाने प्रकाशझोतात आला आहे. रितेशचे दिवंगत वडील विलासराव देशमुख हे महाराष्ट्राचे माजी मुख्यमंत्री होते, तर त्याचे दोन्ही भाऊ सध्या राजकारणात सक्रिय आहेत. याच मजबूत राजकीय पार्श्वभूमीमुळे रितेश देशमुख आगामी काळात सक्रिय राजकारणात प्रवेश करणार का, हा प्रश्न पुन्हा एकदा ऐरणीवर आला आहे.
थलापती विजयच्या यशाशी तुलना; रितेशचे सूचक विधान
दरम्यान, नुकत्याच झालेल्या एका जाहीर कार्यक्रमात रितेशला त्याच्या राजकीय प्रवासाबाबत थेट प्रश्न विचारण्यात आला. तामिळनाडूमध्ये सुपरस्टार थलापती विजय यांनी राजकारणात उतरून घवघवीत यश मिळवले, त्याप्रमाणेच महाराष्ट्रात प्रचंड लोकप्रियता आणि तगडी राजकीय पार्श्वभूमी असूनही रितेश राजकारणापासून लांब का आहे, असा सवाल त्याला करण्यात आला. यावर आपल्या खास शैलीत उत्तर देताना रितेश म्हणाला, "अभिनेते विजय यांना त्यांच्या लोकप्रियतेची आणि प्रभावाची जेवढी अचूक समज आहे, तितकीच समज मला देखील माझ्या मर्यादांची आहे. त्यामुळे मी असे धाडसी प्रयोग कधीही करणार नाही."
घराणेशाहीच्या टीकेवरून लगावला खुमासदार टोला
राजकारणात येण्यास नकार देण्यामागचे कारण विचारले असता, रितेशने अत्यंत विनोदी पण तितकाच सडेतोड टोला लगावला. तो म्हणाला, "उद्या जर मी निवडणुकीच्या रिंगणात उतरलो, तर एकाच कुटुंबातील किती जण राजकारणात येणार, असा आक्षेप तुम्हीच लोक (माध्यमं आणि जनता) घेणार आहात." रितेश जरी स्वतः थेट निवडणुकीच्या राजकारणात सक्रिय नसला, तरी निवडणुकांच्या काळात तो आपल्या भावांच्या प्रचारासाठी मैदानात उतरताना दिसतो. तूर्तास, राजकारणापेक्षा सिनेसृष्टी आणि आपल्या आगामी प्रोजेक्ट्सवरच आपले पूर्ण लक्ष केंद्रित असल्याचे त्याने या संवादातून स्पष्ट केले आहे.
