नवी दिल्ली: वंदे भारत एक्सप्रेसचा पाया घालणारे आणि पहिली गाडी निर्माण करण्याचे नेतृत्व करणारे सुधांशू मणी यांनी अखेर सात वर्षांनंतर या गाडीत प्रवासी म्हणून पहिला प्रवास केला. 2019 मध्ये पंतप्रधान नरेंद्र मोदी यांच्या हस्ते पहिल्या वंदे भारतचे उद्घाटन झाल्यानंतर मणी यांनी कधीच या गाडीतून प्रवास केला नव्हता. आयसीएफ, चेन्नईचे महाव्यवस्थापक म्हणून 31 डिसेंबर 2018 रोजी निवृत्त झाल्यानंतर नुकतेच त्यांनी लखनौच्या चारबाग स्टेशनवरून प्रयागराजकडे वंदे भारतने प्रवास करत त्यांचा अनुभव व्यक्त केला.
मणी यांचे म्हणणे आहे की गाडीचे बाह्य रूप आजही आकर्षक आणि शिस्तबद्ध दिसते. साइडवॉलवरील काही लहरी रेषा त्यांच्या लक्षात आल्या, परंतु एकूणच इतर भारतीय रेल्वे रेकॉर्डपेक्षा लुक आणि बांधणी श्रेष्ठ असल्याचे त्यांनी नमूद केले. गाडीत प्रवेश करताच एक्झिक्युटिव्ह क्लास कोच स्वच्छ आणि सुबक दिसला, असे ते सांगतात. सीट्स अधिक आरामदायक झाल्या असल्याचे त्यांनी विशेष उल्लेख केले. आधी वापरल्या जाणाऱ्या स्लाइड-फॉरवर्ड यंत्रणेला बदलून आता बॅक रिक्लाईन सुविधा देण्यात आली आहे, ज्यामुळे प्रवास अधिक रिलॅक्स वाटला. आतील सजावट आकर्षक असल्याचे आणि दिला जाणारा खाद्यपदार्थ दर्जेदार व रुचकर असल्याचेही त्यांनी कौतुक करत सांगितले.
तथापि, सकारात्मक अनुभवांबरोबरच त्यांनी काही त्रुटींवर स्पष्टपणे लक्ष वेधले. सर्वात प्रथम, गाडीत प्रवाशांची उपस्थिती अत्यंत कमी असल्याचे त्यांनी नमूद केले. एक्झिक्युटिव्ह कोचमध्ये 25 टक्क्यांपेक्षा कमी आसनं भरली होती, तर चेअर कारमधील परिस्थितीही फार वेगळी नव्हती. यासोबतच त्यांनी पुन्हा एकदा स्लीपर वंदे भारतची गरज अधोरेखित केली. "ही डे-ट्रेन लांब पल्ल्याच्या मार्गांवर स्लीपरशिवाय टिकणार नाही," असे त्यांनी स्पष्ट लिहिले.
गाडीच्या फ्लोअरवर टाकलेल्या अनावश्यक लाल कार्पेटवरही त्यांनी नाराजी व्यक्त केली. मणी यांनी सर्वात गंभीर आक्षेप टॉयलेटमध्ये दिसणाऱ्या दर्जाहीन फिटिंग्जवर घेतला. त्यांच्या मते, कॉस्ट कटिंग आणि मल्टी सोर्स खरेदीमुळे अशा समस्या निर्माण होतात, ज्याचा परिणाम प्रवाशांच्या अनुभवावर होतो. तसेच 160 किमी प्रतितास वेगाची क्षमता असूनही गाडीला 130 किमी प्रतितासपर्यंतच मर्यादा देण्याबद्दलही त्यांनी नाराजी व्यक्त केली. एकूणच, वंदे भारत गाडीच्या मूळ डिझाइन आणि गुणवत्तेवर ते आजही अभिमान व्यक्त करतात; मात्र काही सुधारणा वेळेत झाल्या तर प्रवाशांचा अनुभव आणखी उंचावू शकतो, असे त्यांचे मत आहे.
