8th Pay Commission Update : सातव्या वेतन आयोगाचा कार्यकाळ 31 डिसेंबर 2025 रोजी संपला असून आता आठव्या वेतन आयोगाचे युग सुरू झाले आहे. केंद्र सरकारने गेल्या वर्षीच आठव्या वेतन आयोगाची स्थापना केली असून, हा आयोग पुढील 18 ते 20 महिन्यांत आपला अहवाल सादर करेल. दरम्यान, आठव्या वेतन आयोगाच्या शिफारशी 1 जानेवारी 2026 पासून लागू होणार असल्याचे मानले जात आहे. या पार्श्वभूमीवर, केंद्र सरकार आता महागाई भत्ता (DA) आणि महागाई मदत (DR) बाबत वर्षातील पहिला मोठा निर्णय घेण्याच्या तयारीत आहे.
महागाई भत्त्यात किती वाढ होणार?
केंद्र सरकार वर्षातून दोनदा म्हणजे एकदा जानेवारीत आणि एकदा जुलै महिन्यात महागाई भत्त्यात वाढ जाहीर करते. जानेवारी 2026 च्या सहामाहीसाठी कर्मचाऱ्यांची प्रतीक्षा आता संपण्याची चिन्हे आहेत. या वाढीचे महत्त्वाचे पैलू खालीलप्रमाणे आहेत:
– अपेक्षित वाढ: अखिल भारतीय ग्राहक किंमत निर्देशांक (AICPI-IW) च्या 12 महिन्यांच्या सरासरीनुसार, यावेळी 2 टक्के वाढ होण्याची दाट शक्यता आहे.
– नवा आकडा: सध्याचा 58 टक्के महागाई भत्ता वाढून आता 60 टक्क्यांवर पोहोचण्याचा अंदाज आहे.
– होळीनंतरची घोषणा: सहसा होळीपूर्वी ही घोषणा केली जाते, मात्र यावेळी होळी उलटून गेल्यानंतरही अधिकृत माहिती न आल्याने कर्मचाऱ्यांमध्ये उत्सुकता वाढली आहे.
हेही वाचा – 8th Pay Commission: 8 व्या वेतन आयोगाबाबत मोठी अपडेट; 30 एप्रिलपर्यंत करावं लागणार 'हे' काम, अन्यथा…
आठव्या वेतन आयोगाची अंमलबजावणी
आठव्या वेतन आयोगाच्या शिफारशी लागू व्हायला किमान दीड वर्षाचा कालावधी लागू शकतो, मात्र त्यांचा प्रभाव 1 जानेवारी 2026 पासूनच ग्राह्य धरला जाण्याची शक्यता आहे. हे लक्षात घेण्यासारखे आहे की, सरकार वेतन आयोगाच्या शिफारशी जशाच्या तशा लागू करण्यास बांधील नसते, मात्र वाढत्या महागाईमुळे कर्मचारी आणि पेन्शनधारकांना दिलासा देण्यासाठी सरकार सकारात्मक निर्णय घेऊ शकते.
कर्मचाऱ्यांच्या नजरा सरकारी निर्णयाकडे
सरकार महागाई भत्ता नेहमी राऊंड फिगरमध्ये जाहीर करते, त्यामुळेच तो 60 टक्के होण्याचे संकेत मिळत आहेत. या निर्णयामुळे सुमारे 50 लाखांहून अधिक केंद्रीय कर्मचारी आणि 65 लाखांहून अधिक पेन्शनधारकांना थेट फायदा होईल. आता केवळ सरकारच्या अधिकृत घोषणेची प्रतीक्षा असून, लवकरच यावर शिक्कामोर्तब होण्याची शक्यता वर्तवली जात आहे.
