Twisha Sharma Case : सध्या कारागृहात असलेल्या माजी न्यायाधीश गिरीबाला सिंह यांच्या 'बागमुगलिया एक्स्टेंशन' येथील बंद घरात चोरी झाल्याची धक्कादायक घटना समोर आली आहे. या चोरीचे सीसीटीव्ही फुटेज हाती आले असून, यामध्ये चोर अत्यंत निवांतपणे कपाटांची झडती घेताना दिसत आहेत. विशेष म्हणजे, याच घरात 12 मे रोजी 'ट्विशा' या माजी मॉडेलचा मृतदेह संशयास्पद स्थितीत आढळला होता. या चोरीच्या घटनेत घरातून एक बंदूक आणि दागिने लंपास करण्यात आले आहेत. 28 जूनच्या पहाटे तोंडाला मास्क लावलेले चोरटे पहिल्या मजल्यावरील बेडरूममध्ये शिरले, जिथे माजी न्यायाधीश आणि त्यांचा मुलगा समर्थ राहायचे. मोबाईलच्या टॉर्चचा वापर करत चोरांनी कोणत्याही घाईगडबडीशिवाय कपाटे आणि ड्रॉवरमधील वस्तूंची बारकाईने तपासणी केली.
पुरावे नष्ट करण्याचा मोठा कट? लष्करी अधिकारी असलेल्या भावाचा आरोप
या चोरीच्या वेळेवर मृत तरुणी ट्विशाचे वडील नवनिधी शर्मा आणि तिचा भाऊ हर्षित (जे लष्करी अधिकारी आहेत) यांनी गंभीर प्रश्न उपस्थित केले आहेत. प्रकरणाचा तपास भरकटवण्यासाठी आणि महत्त्वाचे डिजिटल किंवा भौतिक पुरावे नष्ट करण्यासाठीच हा चोरीचा कट रचला गेल्याचा संशय कुटुंबीयांनी व्यक्त केला आहे. दरम्यान, 28 जून रोजी पहाटे 5 वाजता गस्त घालणाऱ्या पोलीस पथकाला तीन संशयित व्यक्ती आढळल्या होत्या. त्यापैकी दोघे जण पळून गेले, मात्र तिसऱ्याला पकडण्यात पोलिसांना यश आले. त्याच्याकडील बॅगेतून माजी न्यायाधीशांच्या वडिलांचे जुने परवानाधारक रिव्हॉल्व्हर आणि चांदीचे दागिने जप्त करण्यात आले आहेत.
सीबीआयचा न्यायालयात विरोध; आरोपींच्या कोठडीत 14 जुलैपर्यंत वाढ
या घटनेनंतर, भोपाळ मध्यवर्ती कारागृहातून व्हिडिओ कॉन्फरन्सिंगद्वारे हजर झालेल्या माजी न्यायाधीश गिरीबाला सिंह यांनी पोलिसांकडे जबाब नोंदवण्याची परवानगी न्यायालयाकडे मागितली. मात्र, सीबीआयने या विनंतीला न्यायालयात तीव्र विरोध केला. प्रकरणाचा तपास अद्याप अपूर्ण असून दुसऱ्या शवविच्छेदन अहवालाची प्रतीक्षा असल्याचे सीबीआयने सांगितल्यानंतर, न्यायालयाने आई आणि मुलाची न्यायालयीन कोठडी 14 जुलैपर्यंत वाढवली आहे.
हेही वाचा – ISRO Headquarters Bomb Threat: बंगळुरूत खळबळ! ISRO मुख्यालयाला बॉम्बने उडवण्याची धमकी; सुरक्षा यंत्रणा सतर्क
डिजिटल पुरावे आणि फॉरेन्सिक तपासणीचे आव्हान
या प्रकरणातील गुंतागुंत सोडवण्यासाठी सीबीआयने स्थानिक न्यायालयात 2 महत्त्वपूर्ण अर्ज दाखल केले आहेत. आरोपी समर्थ सिंह याच्याकडून जप्त केलेला लॅपटॉप फॉरेन्सिक टीमला अनलॉक करता येत नसल्याने, सीबीआयने त्याच्या पासवर्डची मागणी केली आहे. याशिवाय, प्रकरणाशी संबंधित काही संवेदनशील ऑडिओ क्लिपिंग्जची सत्यता तपासण्यासाठी आरोपींच्या आवाजाचे नमुने घेऊन 'व्हॉइस स्पेक्ट्रोग्राफी' चाचणी करण्याची परवानगीही सीबीआयने न्यायालयाकडे मागितली आहे.
