Adani Power Bihar project : बिहार सरकारने 2,400 मेगावॉटच्या भागलपूर (पीरपैंती) औष्णिक वीज प्रकल्पाचे (Thermal Power Project) कंत्राट अदानी पॉवर लिमिटेडला (Adani Power Limited) दिले आहे. एका अत्यंत स्पर्धात्मक निविदा प्रक्रियेनंतर (Competitive Tender Process) ही मंजुरी देण्यात आली आहे. सूत्रांनी दिलेल्या माहितीनुसार, अदानी पॉवरने इतर तीन दावेदारांच्या तुलनेत सर्वात कमी वीज दराची बोली लावली होती.
सर्वात कमी दर आणि स्पर्धा
बिहार सरकारने राज्याची वाढती वीज मागणी पूर्ण करण्यासाठी ही खुली निविदा जारी केली होती. 2034-35 पर्यंत राज्याची वीज मागणी 17,000 मेगावॅटहून अधिक होण्याची शक्यता आहे.
अदानींची बोली : निविदा प्रक्रियेशी संबंधित सूत्रांनी सांगितले की, अदानी पॉवरने या प्रकल्पासाठी 6.075 रुपये प्रति युनिट दराची बोली लावली, जी टोरेंट पॉवर (Torrent Power), जेएसडब्ल्यू एनर्जी (JSW Energy) आणि ललितपूर पॉवर जनरेशन (Lalitpur Power Generation) यांच्या बोलीपेक्षा सर्वात कमी होती. या दरात 4.165 रुपये प्रति युनिटचा स्थायी शुल्क आणि 1.91 रुपये प्रति युनिटचा इंधन शुल्क समाविष्ट आहे.
इतर बोली: टोरेंट पॉवरने 6.145 रुपये, ललितपूर पॉवरने 6.165 रुपये आणि जेएसडब्ल्यू एनर्जीने 6.205 रुपये प्रति युनिटची बोली लावली होती.
अत्यंत स्पर्धात्मक दर: बिहार सरकारने हा दर 'अत्यंत स्पर्धात्मक' असल्याचे म्हटले आहे. अलीकडेच मध्य प्रदेशमध्ये अशाच एका प्रकल्पासाठी स्थायी शुल्क 4.222 ते 4.298 रुपये प्रति युनिट होते.
हेही वाचा - Layoffs : कपातीचे वादळ! 2025 मध्ये 1 लाखाहून अधिक नोकऱ्या गेल्या; या क्षेत्रातल्या कामगारांसाठी सर्वाधिक कठीण 'काळ'
मोठी गुंतवणूक आणि राजकीय वाद
या संपूर्ण प्रक्रियेत पारदर्शकता (Transparency) ठेवण्यासाठी सर्व प्रस्तावांचे मूल्यांकन ई-बोली प्रणालीद्वारे (E-Bidding System) केले गेले.
गुंतवणूक: या प्रकल्पामध्ये सुमारे 30,000 कोटी रुपयांची गुंतवणूक होण्याची शक्यता असून, यामुळे राज्यात औद्योगिक क्रियाकलाप आणि रोजगारामध्ये लक्षणीय वाढ होईल, असा अंदाज आहे.
राजकीय विवाद: मात्र, राज्यात सुरू असलेल्या विधानसभा निवडणुकीच्या प्रक्रियेदरम्यान अदाणी समूहाला हा प्रकल्प मिळाल्याने तो राजकीय वादाचा मुद्दा बनला आहे.
माजी केंद्रीय वीज मंत्री आर. के. सिंह यांनी बिहारमध्ये 'वीज खरेदीत घोटाळा' झाल्याचा आरोप केला आहे. विरोधी पक्ष काँग्रेसचे सरचिटणीस के. सी. वेणुगोपाल यांनी एक्सवर पोस्ट करून आरोप केला की, "अदाणी समूहाला बिहारमध्ये विशेष सवलती दिल्या जात आहेत. सहा रुपये प्रति युनिटच्या दराने वीज खरेदी करण्याचा प्रस्ताव म्हणजे गरिबांचे आणि मध्यमवर्गीयांचे पैसे मोदींच्या जवळच्या उद्योगपतींच्या झोळीत टाकण्यासारखे आहे."
सूत्रांनी मात्र हे आरोप फेटाळून लावले असून, 6.075 रुपये प्रति युनिटचा दर उत्पादन खर्चातील अलीकडील वाढीनंतरही स्पर्धात्मक आहे आणि अदानी पॉवरला कोणतीही सवलत देण्यात आलेली नाही, असे स्पष्ट केले.
हेही वाचा - Paytm New Feature : आता प्रत्येक पेमेंटवर मिळणार सोनं! Paytm ने लाँच केलं दमदार फीचर; Gold Rewards रिडीम करण्याची सोपी पद्धत