Viral Incident: उत्तर प्रदेशातील औरैया जिल्ह्यात घडलेली एक विचित्र आणि चर्चेची घटना सध्या सोशल मीडियासह संपूर्ण परिसरात चर्चेचा विषय ठरली आहे. ठरवून दिलेल्या लग्नाला नकार देण्यासाठी एका २५ वर्षीय तरुणीने अक्षरशः थरारक शक्कल लढवत गावकऱ्यांना आणि कुटुंबीयांना काही काळासाठी गोंधळात टाकले. पलंगावर सापाची कात टाकून, आपण नागिणीत रूपांतर झाल्याचा आभास निर्माण करत ती तरुणी आपल्या प्रियकरासोबत घरातून पळून गेली.
औरैया जिल्ह्यातील फफुंद पोलीस ठाण्याच्या हद्दीतील ही घटना आहे. संबंधित तरुणीचे नाव रीना असल्याची माहिती पोलिसांनी दिली आहे. कुटुंबीय तिचे लग्न जबरदस्तीने ठरवत असल्याने ती नाराज होती. याच लग्नातून सुटका करण्यासाठी तिने अतिशय नियोजनबद्ध कट रचल्याचे पोलिस तपासात समोर आले आहे.
रविवारी रात्री रीनाने आपल्या खोलीतील पलंगावर सुमारे पाच फूट लांबीची सापाची कात ठेवली आणि घरातून शांतपणे निघून गेली. दुसऱ्या दिवशी सकाळी कुटुंबीयांच्या नजरेस ही कात पडताच एकच खळबळ उडाली. काही क्षणातच गावात अफवा पसरली की तरुणीचे सापात रूपांतर झाले आहे. काहींनी याला दैवी संकेत मानले, तर काहींनी भीतीपोटी घराजवळ जाणेही टाळले.
Mystery in UP's Auraiya: 20-yr-old woman vanishes from bed overnight, leaving clothes, jewellery – and a 5-ft snake skin. Rumours of 'ichchadhari naagin' have started doing rounds. Police dismiss as distraction & launch search. pic.twitter.com/FzXeZrVTMO — Piyush Rai (@Benarasiyaa) February 11, 2026
घटनेची माहिती मिळताच पोलीस घटनास्थळी दाखल झाले. फफुंद पोलीस ठाण्याचे प्रभारी अधिकारी अजय कुमार यांनी सांगितले की, हा प्रकार लोकांची दिशाभूल करण्यासाठी मुद्दाम रचण्यात आला होता. “या घटनेत कोणतेही अलौकिक किंवा चमत्कारिक रूपांतर झालेले नाही. ही केवळ अतिशय हुशारीने आखलेली पलायनाची योजना आहे,” असे त्यांनी स्पष्ट केले.
पोलिसांनी तपास सुरू केल्यानंतर काही तासांतच सत्य समोर आले. रीना एका तरुणासोबत प्रेमसंबंधात होती आणि त्याच्यासोबतच ती घरातून पळून गेल्याचे निष्पन्न झाले. सापाची कात वापरून कुटुंबीय आणि गावकऱ्यांचा गैरसमज निर्माण करून वेळ मिळवणे, हाच तिचा उद्देश होता.
दिबियापुरचे वर्तुळ अधिकारी मनोज गंगवार यांनी सांगितले की, या प्रकरणी एफआयआर दाखल करण्यात आली असून तरुणी आणि तिच्या साथीदाराचा शोध घेण्यासाठी पथके तयार करण्यात आली आहेत. “आम्ही साप शोधत नाही, तर एका व्यक्तीचा शोध घेत आहोत. नागिनीत रूपांतर झाल्याची चर्चा पूर्णपणे अफवा आहे,” असे त्यांनी ठामपणे सांगितले.
दरम्यान, या घटनेमुळे गावात भीती आणि कुतूहलाचे वातावरण निर्माण झाले होते. अंधश्रद्धा आणि अफवांमुळे किती वेगाने गैरसमज पसरू शकतात, याचे हे ताजे उदाहरण असल्याचे पोलीस आणि प्रशासनानेही मान्य केले आहे. सध्या पोलीस या जोडप्याचा शोध घेत असून पुढील तपास सुरू आहे.
