उत्तर प्रदेशातील बुलंदशहर जिल्ह्यात शुक्रवारी एक अत्यंत मन हेलावून टाकणारी आणि भीषण दुर्घटना घडली आहे. बेलोन मंदिराच्या दर्शनासाठी निघालेल्या भाविकांची ‘ईको’ कार अनियंत्रित होऊन रस्त्याकडच्या एका मोठ्या झाडावर जोरदार आदळली. या अपघातात एकाच कुटुंबातील 5 जणांचा दुर्दैवी जागीच मृत्यू झाला, तर इतर 3 जण गंभीर जखमी झाले. या दुर्घटनेमुळे संबंधित कुटुंबावर आणि संपूर्ण गावावर दुःखाचा डोंगर कोसळला असून परिसरात हळहळ व्यक्त होत आहे.
नियंत्रण सुटल्याने कार थेट झाडावर आदळली
मिळालेल्या माहितीनुसार, कासगंज जिल्ह्यातील ‘देहली बुजुर्ग’ गावातील एकाच कुटुंबातील 8 सदस्य मारुती ‘ईको’ कारने प्रसिद्ध बेलोन मंदिराकडे प्रवासासाठी निघाले होते. बुलंदशहर येथील नरोरा पोलीस ठाण्याच्या हद्दीतील रतनपूर गावाजवळ आल्यावर अचानक चालकाचे गाडीवरील ताबा सुटला. चालकाला डुलकी लागल्यामुळे किंवा गाडीचा वेग अधिक असल्यामुळे हा अपघात घडला असावा, असा प्राथमिक अंदाज पोलिसांनी वर्तवला आहे. धडक इतकी भयंकर आणि जोरदार होती की, कारचा चुराडा झाला असून प्रवाशांना सावरण्याची कोणतीही संधी मिळाली नाही.
3 जणांची प्रकृती चिंताजनक
या भीषण अपघातात 3 पुरुष, 1 महिला आणि अगदी 1 वर्षाच्या चिमुकल्या मुलीचा जागीच प्राण गेला. घटनेची माहिती मिळताच नरोरा पोलीस ठाण्याचे पथक तातडीने घटनास्थळी दाखल झाले. त्यांनी स्थानिक नागरिकांच्या मदतीने सर्व जखमींना तातडीने जवळच्या रुग्णालयात हलवले. मात्र, जखमींची प्रकृती अतिशय गंभीर असल्यामुळे डॉक्टरांनी त्यांना प्राथमिक उपचारानंतर तत्काळ मोठ्या रुग्णालयात हलवले आहे.
हेही वाचा – खळबळजनक! पतीने आवळला पत्नीचा गळा; नंतर स्वत:ही उचललं टोकाचं पाऊल, कंपनीला ई-मेल पाठवून दिली माहिती
मृत झालेल्या व्यक्तींमध्ये प्रगती (1 वर्ष), लोकेन्द्र (28 वर्षे), बबिता (35 वर्षे), रामदीन (50 वर्षे) आणि शिवशंकर मिश्रा (55 वर्षे) यांचा समावेश आहे. या अपघातात एकाच कुटुंबातील अनेक जण गेल्यामुळे सर्वत्र शोककळा पसरली आहे. पोलीस प्रशासनाकडून या प्रकरणी पुढील कायदेशीर प्रक्रिया आणि तपास सुरू आहे.
