India Aviation Safety: भारताच्या विमान वाहतूक नियामकाने (DGCA) केलेल्या ताज्या ऑडिटमध्ये देशातील विमान प्रवाशांच्या सुरक्षेबाबत अत्यंत चिंताजनक माहिती समोर आली आहे. नागरी विमान वाहतूक मंत्रालयाने लोकसभेत दिलेल्या अधिकृत माहितीनुसार, तपासणी केलेल्या 754 विमानांपैकी 377 विमानांमध्ये गंभीर तांत्रिक दोष आणि वारंवार उद्भवणाऱ्या समस्या आढळून आल्या आहेत. ही तपासणी जानेवारी 2025 ते 3 फेब्रुवारी 2026 या कालावधीत करण्यात आली असून, यामुळे हवाई वाहतूक सुरक्षेवर प्रश्नचिन्ह उपस्थित झाले आहे.
एअर इंडिया आणि इंडिगोची स्थिती चिंताजनक
सरकारी आकडेवारीनुसार, एअर इंडियाची परिस्थिती सर्वात वाईट आहे. एअर इंडिया ग्रुपच्या एकूण 267 विमानांपैकी 191 विमानांमध्ये (72 टक्के) वारंवार तांत्रिक बिघाड होत असल्याचे निदर्शनास आले आहे. म्हणजेच, तपासणी केलेल्या प्रत्येक 4 विमानांपैकी 3 विमानांत दोष आहेत. देशातील सर्वात मोठी विमान कंपनी असलेल्या इंडिगोची अवस्थाही समाधानकारक नाही. इंडिगोच्या 405 विमानांपैकी 148 विमानांमध्ये वारंवार तांत्रिक दोष (Repetitive Defects) आढळून आले आहेत.
हेही वाचा - प्रवाशांना भोगावा लागणार त्रास! Ola, Uber आणि Rapido जाणार संपावर, काय आहेत मागण्या?
सरकारने लोकसभेत मांडली आकडेवारी
नागरी विमान वाहतूक राज्यमंत्री मुरलीधर मोहोळ यांनी लोकसभेत सांगितले की, DGCA ने गेल्या वर्षी व्यापक सुरक्षा मोहीम राबवली. यामध्ये 3,890 पाळत तपासणी, 56 ऑडिट, 492 रॅम्प तपासणी आणि 84 परदेशी विमानांची तपासणी करण्यात आली. याशिवाय 874 स्पॉट तपासणी आणि 550 रात्रीच्या पाळत तपासण्यांचा समावेश होता. इतर विमान कंपन्यांमध्ये एअर इंडिया एक्सप्रेसच्या 54, स्पाइसजेटच्या 16, अकासा एअरच्या 14 आणि एअर इंडिया एअरलाइन्सच्या 8 विमानांमध्ये समस्या नोंदवण्यात आल्या आहेत.
तांत्रिक बिघाड की केबिनमधील समस्या? एअर इंडियाचे स्पष्टीकरण
या अहवालावर प्रतिक्रिया देताना एअर इंडियाच्या प्रवक्त्याने सांगितले की, त्यांनी स्वतःहून ताफ्याची अत्यंत बारकाईने तपासणी केल्यामुळे ही संख्या जास्त दिसत आहे. कंपनीच्या मते, बहुतेक समस्या या 'श्रेणी D' मधील आहेत, ज्यामध्ये तुटलेली सीट, ट्रे टेबल, पडदे किंवा खिडक्यांच्या समस्यांचा समावेश आहे. या समस्या थेट विमान सुरक्षेशी संबंधित नसून प्रवाशांच्या सोयीशी संबंधित आहेत. पुढील 2 वर्षांत नॅरो-बॉडी विमानांसाठी रेट्रोफिट कार्यक्रम सुरू झाल्यावर या त्रुटी दूर केल्या जातील, असे कंपनीने स्पष्ट केले.