नवी दिल्ली: गुप्तचर संचालनालयाने (The Directorate of Revenue Intelligence, DRI) मुंबईत मोठी कारवाई करत आंतरराष्ट्रीय कुरिअरमार्गे आलेले परदेशी सोने जप्त केले आहे. रियाधहून मुंबईतील इंटरनॅशनल कुरिअर टर्मिनलवर आलेल्या एका पार्सलमधून 1.815 किलो सोने हस्तगत करण्यात आले असून, त्याची अंदाजे किंमत 2.89 कोटी रुपये इतकी आहे. विशेष बाब म्हणजे हे सोने एका मांस कुटण्याच्या मशीनमध्ये अतिशय हुशारीने लपवण्यात आले होते.
डीआरआय अधिकाऱ्यांनी पार्सलची सखोल तपासणी केल्यानंतर मांस कुटण्याचे मशीन पूर्णपणे उघडून पाहिले. मशीनमधील अंतर्गत गिअर फोडल्यानंतर त्यामध्ये वेगवेगळ्या आकाराचे 32 तुकडे केलेले सोने आढळून आले. एकूण 1,815 ग्रॅम सोने आणि ते लपवण्यासाठी वापरण्यात आलेले मशीन कस्टम्स कायदा 1962 अंतर्गत जप्त करण्यात आले आहे.
या कारवाईनंतर डीआरआयने तात्काळ पुढील तपास करत दोन जणांना ताब्यात घेतले. यामध्ये एक व्यक्ती कुरिअर पार्सल स्वीकारण्यासाठी आलेली होती, तर दुसऱ्या व्यक्तीने शिपमेंट क्लिअर करण्यासाठी केवायसी कागदपत्रांची व्यवस्था केल्याचे समोर आले आहे. या दोघांची कसून चौकशी सुरू असून, सोने तस्करीच्या साखळीतील इतर दुवे उघडकीस येण्याची शक्यता वर्तवली जात आहे.
हेही वाचा: Ravi Pujari Arrested : कोरिओग्राफर रेमो डिसूझाला खंडणी मागितल्याप्रकरणी गँगस्टर रवी पुजारी अटकेत; मुंबई पोलिसांची कारवाई
या प्रकरणातून सोन्याच्या तस्करीसाठी वापरल्या जाणाऱ्या नव्या आणि अत्यंत प्रगत पद्धती पुन्हा एकदा समोर आल्या आहेत. यंत्रसामग्रीच्या आतील भागात सोने लपवून तपास यंत्रणांची फसवणूक करण्याचा प्रयत्न केला जात असल्याचे डीआरआयने नमूद केले आहे. आंतरराष्ट्रीय तस्करी नेटवर्क उद्ध्वस्त करण्यासाठी आणि देशाच्या आर्थिक सुरक्षेचे संरक्षण करण्यासाठी डीआरआय कटिबद्ध असल्याचे अधिकाऱ्यांनी स्पष्ट केले आहे.
दरम्यान, याच महिन्याच्या सुरुवातीला डीआरआयने सीमापार सोन्याच्या तस्करीविरोधात मोठी धडक कारवाई केली होती. दिल्ली आणि अगरतळा येथे एकाचवेळी छापे टाकून दुबई आणि बांगलादेशमधून चालवली जाणारी एक संघटित आंतरराष्ट्रीय सोन्याची तस्करी करणारी टोळी उघडकीस आणण्यात आली. या कारवाईत 29 किलोहून अधिक परदेशी सोने आणि सुमारे 2.90 कोटी रुपयांची रोकड जप्त करण्यात आली होती.
विशिष्ट गुप्त माहितीच्या आधारे 6 जानेवारी 2026 रोजी त्रिपुरातील अगरतळाहून आलेल्या दोन शिपमेंट्स स्वीकारताना या टोळीतील एका प्रमुख सदस्याला अटक करण्यात आली. तपासात 15 किलो परदेशी सोने सापडले, ज्यावर आंतरराष्ट्रीय रिफायनरीची चिन्हे होती आणि त्याची किंमत सुमारे 20.73 कोटी रुपये इतकी होती. त्यानंतर दिल्ली आणि अगरतळ्यातील विविध ठिकाणी झालेल्या छाप्यांमध्ये आणखी 14.2 किलो सोने आणि भारतीय व बांगलादेशी चलनासह 2.90 कोटी रुपयांची रोकड जप्त करण्यात आली.
एकूणच या कारवाईत सुमारे 40 कोटी रुपये किमतीचे 29.2 किलो सोने आणि 2.9 कोटी रुपयांची रोकड हस्तगत करण्यात आली असून, चार आरोपींना अटक करण्यात आली आहे. या दोन्ही प्रकरणांचा पुढील तपास सुरू असून, आंतरराष्ट्रीय तस्करीच्या मोठ्या नेटवर्कचा पर्दाफाश होण्याची शक्यता तपास यंत्रणांनी व्यक्त केली आहे.
हेही वाचा: Sheikh Hasina : मुहम्मद युनूसची 'कठपुतली राजवट' उलथवून टाका; शेख हसीना यांचं बांगलादेशातील नागरिकांना आवाहन