FASTag ॲन्युअल पासची मोठी कामगिरी; विक्रीचा कोटींचा टप्पा पार, जाणून घ्या पात्रता अन् अर्ज करण्याची सोपी पद्धत

FASTag Annual Pass: राष्ट्रीय महामार्गावरून वारंवार प्रवास करणाऱ्या बिगर-व्यावसायिक वाहनधारकांच्या प्रवासाला अधिक सोपे बनवणाऱ्या फास्टॅग एनुअल पासने एक नवा टप्पा गाठला आहे. आपल्या प्रारंभापासून एका वर्षाच्या आतच या वार्षिक पासच्या विक्रीने 1 कोटीचा टप्पा यशस्वीपणे पार केला आहे. या योजनेअंतर्गत वाहनचालकांना 3,075 रुपयांच्या एकरकमी शुल्कामध्ये 1 वर्षाची वैधता किंवा 200 टोल नाके पार करण्याची मुभा मिळते. दोन्हीपैकी जी अट आधी पूर्ण होईल, त्यानुसार या पासची मुदत गृहीत धरली जाते.

नवीन वनटॅग (OneTag) सेवा काय आहे?
नॅशनल हायवेज ॲथॉरिटी ऑफ इंडियाने (NHAI) ‘राजमार्गयात्रा’ अ‍ॅपद्वारे वनटॅग ही विशेष सेवा सुरू केली आहे. ही मुळात पोर्टेबिलिटी सुविधा असून, त्याद्वारे वापरकर्ते गाडीवर लावलेला मुख्य फास्टॅग न बदलता आपली बँक सहज बदलू शकतात.

– पात्रता तपासण्यासाठी वाहनचालकांना राजमार्गयात्रा अ‍ॅप उघडून आपल्या गाडीचा नोंदणी क्रमांक नोंदवावा लागतो.
– यानंतर फास्टॅग जारी करणाऱ्या सध्याच्या बँकेकडून 6 अंकी मोबाईल व्हॅरिफिकेशन कोड (MVC) प्राप्त होतो.
– पडताळणीची प्रक्रिया पूर्ण झाल्यावर वापरकर्ते आपल्या पसंतीची नवी बँक निवडून केवायसी (KYC) प्रक्रिया पूर्ण करू शकतात.

हेही वाचा – तिकीट असूनही दंड वसूल! रेल्वेचा कडक नियम लागू, प्रवाशांनो ‘ही’ चूक टाळा

पात्रता आणि अटी
फास्टॅग ॲन्युअल पासचा लाभ केवळ खाजगी किंवा बिगर-व्यावसायिक वाहनांनाच मिळतो. ज्या वाहनांवर वैध फास्टॅग आधीच बसवलेला आहे, त्या वाहनांसाठीच हा पास उपलब्ध आहे. राजमार्गयात्रा अ‍ॅपच्या माध्यमातून एकरकमी पेमेंट केल्यानंतर हा पास गाडीवर आधीपासून कार्यरत असलेल्या फास्टॅगवरच थेट सुरू केला जातो.

अर्ज करण्याची सोपी ऑनलाईन प्रक्रिया
वार्षिक पास मिळवण्यासाठी पात्र वाहनधारक खालील टप्प्यांचा वापर करून अर्ज करू शकतात:

1.गुगल प्ले स्टोअर किंवा अ‍ॅपल अ‍ॅप स्टोअरवरून राजमार्गयात्रा हे अधिकृत अ‍ॅप डाऊनलोड करून इन्स्टॉल करा.

2.अ‍ॅप उघडून त्यातील फास्टॅग एनुअल पास या पर्यायाची निवड करा.

3.आपल्या वाहनाचा अधिकृत नोंदणी क्रमांक आणि इतर विचारलेली माहिती प्रविष्ट करा.

4.नोंदणीकृत मोबाईल क्रमांकावर आलेला ओटीपी (OTP) भरून प्रक्रियेत पुढे जा.

5.युपीआय, डेबिट कार्ड किंवा क्रेडिट कार्डच्या साहाय्याने 3,075 रुपयांचे शुल्क अदा करा.

पेमेंटची प्रक्रिया यशस्वीरीत्या पूर्ण झाल्यानंतर अवघ्या 2 तासांच्या आत फास्टॅग ॲन्युअल पास पूर्णपणे सक्रिय होतो. यामुळे वाहनधारकांची वारंवार रिचार्ज करण्याच्या कटकटीतून मुक्तता होऊन महामार्गावरील प्रवास अधिक वेगात आणि सुलभतेने पार पडतो.

हेही वाचा – पृथ्वीच्या अगदी जवळ येणार ‘शनी’; खगोलप्रेमींना दिसणार ग्रहाची कडी अन् अनोखा नजारा, कधी? वाचा सविस्तर