No Fuel Shortage in India 2026 : मध्य पूर्वेतील तणावाच्या पार्श्वभूमीवर सध्या संपूर्ण देशात पेट्रोल, डिझेल आणि स्वयंपाकाच्या गॅसचा (LPG) प्रचंड तुटवडा निर्माण झाल्याची भीती सर्वसामान्यांमध्ये पसरली आहे. मात्र, केंद्र सरकारने या सर्व चर्चा निव्वळ अफवा असल्याचे सांगत देशातील नागरिकांना मोठा दिलासा दिला आहे. पेट्रोलियम मंत्रालयाने गुरुवारी अधिकृत माहिती जाहीर करत स्पष्ट केले की, देशातील सर्वच पेट्रोल पंपांवर आणि गॅस एजन्सींकडे इंधनाचा पुरेसा साठा (Adequate Stock) उपलब्ध आहे. त्यामुळे नागरिकांनी कोणत्याही अफवांना बळी पडून घाबरून अतिरिक्त खरेदी (Panic Buying) करण्याची अजिबात गरज नाही.
केवळ 3 दिवसांत 1.34 कोटी सिलिंडरची डिलिव्हरी
नागरिकांमधील भीती दूर करण्यासाठी आणि इंधनाचा अखंड पुरवठा सुनिश्चित करण्यासाठी सरकार आणि तेल कंपन्या पूर्ण ताकदीने काम करत आहेत. पेट्रोलियम मंत्रालयाने दिलेल्या आकडेवारीनुसार, केवळ गेल्या 3 दिवसांमध्ये देशभरात विक्रमी संख्येने तब्बल 1.34 कोटींहून अधिक एलपीजी सिलिंडर ग्राहकांच्या घरांपर्यंत यशस्वीरित्या पोहोचवण्यात आले आहेत, तर या 3 दिवसांत एकूण बुकिंगचा आकडा सुमारे 1.32 कोटी इतका होता. बुधवारच्या एकाच दिवसाचा विचार केल्यास, देशात 45.36 लाख सिलिंडरच्या बुकिंगच्या तुलनेत अंदाजे 47.51 लाख एलपीजी सिलिंडरची डिलिव्हरी करण्यात आली. यावरून सरकारी यंत्रणेच्या तत्परतेचा सहज अंदाज लावता येतो.
58,500 हून अधिक ग्राहकांनी सोडले एलपीजी कनेक्शन
शहरांमध्ये पाईपद्वारे येणाऱ्या नैसर्गिक वायूचा (PNG) विस्तार वेगाने होत असल्याने पारंपरिक एलपीजी सिलिंडरवरील ताण कमी होत आहे. केंद्र सरकारने दिलेल्या माहितीनुसार, 20 मेपर्यंत देशातील 58,500 हून अधिक पीएनजी वापरकर्त्यांनी आपले जुने एलपीजी कनेक्शन अधिकृतपणे सरेंडर (Surrender) केले आहे. मार्च महिन्यापासून आतापर्यंत देशात सुमारे 7.64 लाख नवीन पीएनजी कनेक्शनचा गॅस पुरवठा यशस्वीरित्या सुरू करण्यात आला असून, अतिरिक्त 2.81 लाख कनेक्शनसाठी पायाभूत सुविधा (Infrastructure) पूर्ण करण्यात आल्या आहेत. यामुळे एकूण सक्रिय पीएनजी कनेक्शनची संख्या 10.45 लाख झाली असून, आणखी 7.99 लाख ग्राहकांनी नवीन कनेक्शनसाठी आपली नोंदणी केली आहे.
काळाबाजार रोखण्यासाठी 'DAC' पॅटर्न; 96 टक्के डिलिव्हरी सुरक्षित
गॅस सिलिंडरच्या वितरणात होणारी घरघर आणि बेकायदेशीर काळाबाजार रोखण्यासाठी सरकारने तंत्रज्ञानाचा कडक वापर सुरू केला आहे. सध्या उद्योग स्तरावर तब्बल 99 टक्क्यांपर्यंत एलपीजी सिलिंडरचे बुकिंग ऑनलाइन माध्यमातून केले जात आहे. तसेच, 'डिलिव्हरी ऑथेंटिकेशन कोड' (DAC) वर आधारित गॅस डिलिव्हरीचे प्रमाण आता 96 टक्क्यांपर्यंत वाढले आहे. या प्रणालीत ग्राहकाच्या नोंदणीकृत मोबाईल नंबरवर एक सुरक्षित कोड (OTP) पाठवला जातो, जो डिलिव्हरी बॉयला दिल्याशिवाय सिलिंडर देता येत नाही. या सुलभ पारदर्शकतेमुळे गॅसची चोरी किंवा अवैध वळवणे पूर्णपणे थांबले आहे.
छोट्या 5 किलोच्या सिलिंडरचीही विक्रमी विक्री
घरगुती मोठ्या सिलिंडरसोबतच बाजारात लहान आकाराच्या सिलिंडरची मागणीही प्रचंड वाढली आहे. मंत्रालयाने जाहीर केलेल्या अहवालानुसार, गेल्या केवळ 3 दिवसांच्या कालावधीत अंदाजे 1.87 लाख इतक्या मोठ्या संख्येने 5 किलो वजनाचे एफटीएल (Free Trade LPG) सिलिंडर विकले गेले आहेत. हे लहान सिलिंडर प्रामुख्याने विद्यार्थी, मजूर आणि स्थलांतरित लोकांमध्ये अत्यंत लोकप्रिय ठरत आहेत. एकूणच, आंतरराष्ट्रीय बाजारात खनिज तेलाच्या किमतींमध्ये चढ-उतार होत असले, तरी भारतात इंधनाचा कोणताही तुटवडा भासणार नाही, अशी ठाम ग्वाही सरकारने देशवासीयांना दिली आहे.
हेही वाचा – Petrol-Diesel Price Today: आज पेट्रोल-डिझेलच्या किंमती वाढल्या की घटल्या? जाणून घ्या तुमच्या शहरातील नवे दर
