NEET UG Paper Leak: देशभरात बहुप्रतिक्षित असलेली NEET-UG फेरपरीक्षा रविवारी पार पडली. या परीक्षेला संपूर्ण भारतातून 20 लाखांहून अधिक विद्यार्थी बसले होते. मात्र, परीक्षा संपताच सोशल मीडियावर एक व्हिडिओ तुफान व्हायरल झाला, ज्यामध्ये NEET-UG 2026 चा पेपर पुन्हा फुटल्याचा खळबळजनक दावा करण्यात आला होता. या व्हिडिओमुळे विद्यार्थी आणि पालकांमध्ये चिंतेचे वातावरण निर्माण झाले होते; परंतु नॅशनल टेस्टिंग एजन्सीने (NTA) तात्काळ समोर येत हा व्हिडिओ पूर्णपणे खोटा आणि बनावट असल्याचे जाहीर केले आहे.
एका ‘X’ पोस्टमुळे निर्माण झाले प्रश्न; इंटरनेटवर चौकशीची मागणी
सोशल मीडिया प्लॅटफॉर्म ‘X’ (ट्विटर) वर मोहम्मद नौमान नावाच्या युजरने एक व्हिडिओ शेअर करत या प्रकरणाकडे सर्वांचे लक्ष वेधले होते. या युजरने आपल्या पोस्टमध्ये लिहिले होते की, “इंटरनेटवर फिरत असलेल्या या व्हिडिओची सत्यता काय आहे, याबाबत अचूक माहिती समोर आली पाहिजे. प्रशासनाने याची सखोल चौकशी करून अधिकृत तपशील जाहीर करावा. या व्हिडिओमुळे टेलिग्रामवरील बंदी आणि परीक्षेच्या पारदर्शकतेवर अनेक प्रश्न उपस्थित होत आहेत. पुन्हा काही गैरप्रकार झाला आहे की ही केवळ अफवा आहे, याचे स्पष्टीकरण मिळणे गरजेचे आहे.”
कडक सुरक्षेत परीक्षा पार पडली; NTA ने फेटाळले सर्व आरोप
या संपूर्ण प्रकरणावर NTA ने ‘X’ वर एक अधिकृत निवेदन जारी करून आपली भूमिका स्पष्ट केली. एजन्सीने सांगितले की, अत्यंत कडक सुरक्षा व्यवस्था आणि चोख देखरेखीखाली ही परीक्षा देशभरात यशस्वीरित्या पूर्ण झाली आहे. सोशल मीडियावर NEET-UG 2026 संदर्भात फिरणारा तो व्हिडिओ आमच्या निदर्शनास आला असून, त्या व्हिडिओमध्ये करण्यात आलेले सर्व दावे पूर्णपणे निराधार आणि खोटे आहेत, असे NTA ने आपल्या निवेदनात स्पष्ट केले.
अफवा पसरवणाऱ्यांवर होणार कठोर कारवाई; सायबर विभागाची मदत
विद्यार्थ्यांची फसवणूक करणे आणि त्यांच्या मनात भीतीचे वातावरण तयार करणे या उद्देशाने अशी खोटी माहिती तयार करणे आणि ती पसरवणे हा एक गंभीर गुन्हा असल्याचे NTA ने म्हटले आहे. या प्रकाराची एजन्सीने गंभीर दखल घेतली असून, I4C (इंडियन सायबर क्राईम कोऑर्डिनेशन सेंटर) आणि कायदा अंमलबजावणी करणाऱ्या संस्थांच्या (पोलिस) मदतीने हा बनावट व्हिडिओ मूळ कुठून व्हायरल झाला, याचा शोध घेतला जात आहे. अफवा पसरवणाऱ्या मुख्य सूत्रधारांवर कडक कायदेशीर कारवाई केली जाईल, असा इशारा देण्यात आला आहे.
Please give a proper Explanation about this video I found on the Internet . Launch a probe and Provide Authorised Information. This raise a lot of questions Regarding the @telegram Ban. Did something fishy happened again ? Or was it just precautionary? Clarification will help. pic.twitter.com/gn3REGwYrf — Muhammad Nouman (@noummaann) June 21, 2026
अधिकृत माहितीवरच विश्वास ठेवा; एजन्सीचे पालक आणि विद्यार्थ्यांना आवाहन
NTA ने सर्व विद्यार्थी, त्यांचे पालक आणि नागरिकांना कोणत्याही अनधिकृत माहितीवर विश्वास न ठेवण्याचे आवाहन केले आहे. कोणत्याही प्रकारच्या अपडेट्ससाठी केवळ NTA च्या अधिकृत वेबसाइट आणि त्यांच्या पडताळणी केलेल्या (व्हेरिफाईड) सोशल मीडिया अकाउंट्सचाच संदर्भ घ्यावा. तसेच, खात्री नसलेली अशी कोणतीही दिशाभूल करणारी माहिती किंवा व्हिडिओ पुढे (फॉर्वर्ड) पाठवू नये, असेही एजन्सीने स्पष्ट केले आहे.
? OFFICIAL STATEMENT | NEET (UG) 2026 NTA's attention has been drawn to a fabricated video being circulated on social media regarding NEET (UG) 2026. The video is FAKE and the claims it makes are false. The examination was conducted successfully today under comprehensive… — National Testing Agency (@NTA_Exams) June 21, 2026
20 लाखांहून अधिक उमेदवारांची परीक्षा; विक्रमी वेळेत नियोजन यशस्वी
यापूर्वी पेपरफुटीच्या वादामुळे NEET-UG परीक्षा रद्द करावी लागली होती, ज्यामुळे NTA वर मोठी टीका झाली होती. त्यानंतर रविवारी झालेल्या या फेरपरीक्षेला पुन्हा एकदा 20 लाखांहून अधिक उमेदवार बसले होते. या पार्श्वभूमीवर NTA चे महासंचालक अभिषेक सिंग यांनी सांगितले की, ‘संपूर्ण सरकारी यंत्रणेचा एकत्रित दृष्टिकोन’ राबवल्यामुळेच इतक्या मोठ्या प्रमाणावर होणाऱ्या परीक्षेचे नियोजन अत्यंत कमी आणि विक्रमी वेळेत सुरक्षितपणे पूर्ण करणे शक्य झाले.
