पंतप्रधान नरेंद्र मोदी यांच्या फेसबुकवरील एका व्हिडिओभोवती सोमवारी मोठा वाद निर्माण झाला. काही काळासाठी हा व्हिडिओ भारतातील फेसबुक वापरकर्त्यांना पाहता येत नव्हता. त्यानंतर मेटाने ही चूक तांत्रिक कारणामुळे झाल्याचे मान्य करत व्हिडिओ पुन्हा उपलब्ध करून दिला. दरम्यान, या संपूर्ण प्रकरणाची केंद्र सरकारने गंभीर दखल घेत मेटाकडून स्पष्टीकरण मागवले आहे.
घटनाक्रम कसा घडला?
23 जुलै 2026 रोजी पंतप्रधान नरेंद्र मोदी यांनी त्यांच्या अधिकृत फेसबुक अकाउंटवर एक व्हिडिओ शेअर केला होता. विद्यार्थ्यांना उद्देशून दिलेल्या या संदेशात त्यांनी पेपरफुटीच्या घटनांवर सरकार कठोर भूमिका घेणार असल्याचे सांगितले होते. काही दिवसांतच या व्हिडिओला मोठ्या प्रमाणावर प्रतिसाद मिळाला. मात्र, 28 जुलैच्या पहाटे अनेक वापरकर्त्यांना हा व्हिडिओ अचानक दिसेनासा झाला. व्हिडिओ उघडण्याचा प्रयत्न केल्यावर “Legal Request” मुळे हा मजकूर या प्रदेशात उपलब्ध नसल्याचा संदेश फेसबुकवर दिसत होता. त्यामुळे सोशल मीडियावर या घटनेची चर्चा सुरू झाली. काही वेळानंतर मेटाने संबंधित व्हिडिओ पुन्हा पूर्ववत केला आणि ही घटना तांत्रिक त्रुटीमुळे घडल्याचे स्पष्ट केले.
व्हिडिओमध्ये मोदींनी नेमके काय सांगितले?
या व्हिडिओमध्ये पंतप्रधान मोदी यांनी पेपरफुटीच्या घटनांमुळे विद्यार्थी आणि पालकांमध्ये निर्माण झालेल्या चिंतेचा उल्लेख केला होता. अशा प्रकारच्या गैरप्रकारांवर आळा घालण्यासाठी कठोर कायदेशीर तरतुदी, फास्ट-ट्रॅक न्यायालये आणि विशेष न्यायालयांची व्यवस्था करण्याचा सरकारचा मानस असल्याचे त्यांनी सांगितले. तसेच, विद्यार्थ्यांचे भविष्य सुरक्षित ठेवणे ही सरकारची सर्वोच्च प्राथमिकता असल्याचेही त्यांनी स्पष्ट केले.
मेटाने काय स्पष्टीकरण दिले?
या प्रकरणावर प्रतिक्रिया देताना मेटाने संबंधित व्हिडिओ चुकून हटवला गेला होता, असे सांगितले. तांत्रिक त्रुटीमुळे ही घटना घडल्याचे स्पष्ट करत कंपनीने व्हिडिओ पुन्हा उपलब्ध करून दिला आणि दिलगिरी व्यक्त केली.
Meta releases a statement on blocking PM Modi's video on Facebook. "The content was removed in error and has since been restored." says a Meta Spokesperson. pic.twitter.com/SZ082SY5kw — ANI (@ANI) July 28, 2026
सरकारची पुढची भूमिका काय?
या घटनेनंतर केंद्र सरकारने मेटाकडून सविस्तर स्पष्टीकरण मागितले आहे. इलेक्ट्रॉनिक्स आणि माहिती तंत्रज्ञान मंत्रालयाने (MeitY) व्हिडिओ काही काळासाठी ब्लॉक का झाला, याची चौकशी सुरू केली असून आवश्यक असल्यास मेटाच्या वरिष्ठ अधिकाऱ्यांना स्पष्टीकरणासाठी बोलावले जाऊ शकते.
