झारखंडमधील पश्चिम सिंहभूम जिल्ह्यात नक्षलविरोधी कारवाईदरम्यान मोठी घटना घडली असून सेंट्रल रिझर्व्ह पोलिस फोर्सच्या दोन जवानांना दुखापत झाली आहे. शनिवारी सारंडा जंगल परिसरात नक्षलवाद्यांनी लावलेल्या आयईडी स्फोटात हे जवान जखमी झाल्याची माहिती अधिकाऱ्यांनी दिली. जखमींपैकी एका जवानाची प्रकृती गंभीर असल्याचे सांगितले जात आहे.
ही घटना चादरी डेरा गावाजवळ घडली. बंदी घालण्यात आलेल्या कम्युनिस्ट पार्टी ऑफ इंडिया (माओवादी) संघटनेविरोधात जिल्हा पोलीस आणि सीआरपीएफच्या संयुक्त पथकाकडून शोध मोहीम राबवण्यात येत होती. यावेळी जंगल परिसरात पूर्वीच पुरून ठेवलेल्या प्रेशर आयईडीवर एका जवानाचा पाय पडताच जोरदार स्फोट झाला.
पश्चिम सिंहभूमचे पोलीस अधीक्षक अमित रेणू यांनी घटनेची पुष्टी करत सांगितले की, स्फोटात एक जवान गंभीर जखमी झाला असून दुसऱ्या जवानाला किरकोळ दुखापत झाली आहे. स्फोटानंतर तात्काळ बचाव पथकाने जखमी जवानांना जंगलातून बाहेर काढून प्राथमिक उपचार देण्यात आले आहेत.
हेही वाचा: Sharad Pawar Health Update: शरद पवार पुन्हा रुग्णालयात दाखल; सिटीस्कॅन आणि रक्त तपासणीनंतर डॉक्टर नेमकं काय म्हणाले?
जखमी जवानांची प्रकृती लक्षात घेता त्यांना हेलिकॉप्टरच्या मदतीने रांची येथे हलवण्यात आले असून तेथे त्यांच्यावर विशेष वैद्यकीय उपचार सुरू आहेत. जखमी जवानांची प्रकृती स्थिर करण्यासाठी वैद्यकीय पथकाकडून सर्वतोपरी प्रयत्न सुरू असल्याची माहिती प्रशासनाने दिली आहे.
दरम्यान, या हल्ल्यानंतर सुरक्षा दलांनी संपूर्ण परिसराला घेराव घालत व्यापक शोध आणि कॉम्बिंग मोहीम सुरू केली आहे. अलीकडील काळात सुरक्षा दलांनी नक्षलविरोधी कारवाईत मिळवलेल्या यशामुळे नक्षलवाद्यांनी विविध ठिकाणी स्फोटके पेरून जवानांना लक्ष्य करण्याचा प्रयत्न केल्याचा संशय व्यक्त केला जात आहे.
जिल्हा प्रशासनाने स्थानिक ग्रामस्थांना विनाकारण दाट जंगल परिसरात न जाण्याचे आवाहन केले असून संशयास्पद वस्तू किंवा हालचाल आढळल्यास तात्काळ पोलिसांना माहिती देण्याचे आवाहन केले आहे. परिसरात सध्या उच्च सतर्कता लागू करण्यात आली आहे.
हेही वाचा: Dearness Allowance Hike: सातव्या वेतन आयोगाची मोठी झेप; आता महागाई भत्त्यामध्ये होणार 'इतकी' वाढ, 'या' तारखेला होणार अधिकृत घोषणा