मणिपूरची राजधानी इम्फाळमधून एक मोठी आणि चिंताजनक बातमी समोर आली आहे. गुरुवारी इम्फाळमध्ये अन्नविषबाधेच्या (फूड पॉयझनिंग) तीव्र संशयावरून सीमा सुरक्षा दलाच्या (BSF) 75 जवानांसह एकूण 78 जणांना तातडीने रुग्णालयात दाखल करण्यात आले. नाश्ता केल्यानंतर अचानक उलट्या आणि मळमळण्याचा त्रास सुरू झाल्यामुळे या सर्व जवानांना आणि इतर नागरिकांना तातडीने ‘रिजनल इन्स्टिट्यूट ऑफ मेडिकल सायन्स’ (RIMS) या रुग्णालयात नेण्यात आले, जिथे आपत्कालीन विभागात त्यांच्यावर त्वरित उपचार सुरू करण्यात आले असून सद्यस्थितीत त्यांची प्रकृती स्थिर असल्याचे प्रशासनाकडून सांगण्यात आले आहे.
खंडणी वसुली करणाऱ्या दोन दहशतवाद्यांना अटक
एकीकडे अन्नविषबाधेची ही घटना घडली असतानाच, दुसरीकडे मणिपूरमध्ये सुरक्षा दलांनी प्रतिबंधित संघटनांशी संबंधित दोन कुख्यात दहशतवाद्यांना खंडणी वसुलीच्या गंभीर आरोपाखाली अटक केली आहे. राज्य पोलीस कमांडोच्या पथकाने मंगळवारी इम्फाळ पश्चिम जिल्ह्यातील सिंगजामेई परिसरात धडक कारवाई करत 39 वर्षीय अहोंगशांगबाम पिंकुमणी सिंग याला बेड्या ठोकल्या. हा तरुण प्रतिबंधित ‘पीपल्स रिव्होल्युशनरी पार्टी ऑफ कांगलेईपाक’ (PREPAK) या संघटनेचा सक्रिय सदस्य असल्याचे निष्पन्न झाले आहे.
याशिवाय, दुसऱ्या एका स्वतंत्र कारवाईत सुरक्षा दलांनी बिष्णुपूर जिल्ह्यातील क्वाक्ता भागातून 60 वर्षीय मोहम्मद अब्दुल हकीम याला अटक केली. हा वृद्ध व्यक्ती प्रतिबंधित ‘कांगलेईपाक कम्युनिस्ट पार्टी (वांगलेन)’ या संघटनेशी जोडलेला असून, हे दोन्ही दहशतवादी परिसरातील नागरिकांकडून आणि व्यापाऱ्यांकडून खंडणी गोळा करण्याच्या अवैध कामात सक्रियपणे गुंतले होते, अशी माहिती पोलिसांनी दिली.
हेही वाचा – आरोग्य, महसूल अन् पंचायत राज विभागात मोठे बदल; एकाच रात्रीत सात IAS अधिकाऱ्यांच्या तडकाफडकी बदल्या
सुरक्षा यंत्रणा सतर्क; ‘एएफएसपीए’ (AFSPA) लागू
मे 2023 पासून मणिपूरमध्ये मैतेई आणि कुकी-झो समुदायांमध्ये उसळलेल्या वांशिक हिंसाचारामुळे राज्यातील कायदा व सुव्यवस्थेचा प्रश्न गंभीर बनला आहे. या संघर्षात आतापर्यंत 260 हून अधिक लोकांना आपला जीव गमवावा लागला असून हजारो नागरिक विस्थापित झाले आहेत. हिंसाचाराच्या या घटनांना आळा घालण्यासाठी सुरक्षा दलांकडून सर्व जिल्ह्यांमध्ये, विशेषतः सीमावर्ती आणि अतिसंवेदनशील भागांत सतत शोधमोहिमा आणि कडक गस्त घातली जात आहे. दरम्यान, राज्यातील बिघडलेली परिस्थिती लक्षात घेता केंद्र सरकारने मणिपूरमधील काही निवडक भागांना ‘सशस्त्र दल (विशेष अधिकार) कायदा’ अंतर्गत आगामी सहा महिन्यांसाठी ‘अशांत क्षेत्र’ म्हणून घोषित केले आहे.
