उत्तर प्रदेशातील मुजफ्फरनगर जिल्ह्यातील पुरकाजी पोलीस ठाण्याच्या हद्दीत सोमवारी रात्रीच्या सुमारास एक अत्यंत भीषण आणि थरारक अपघात घडला. लक्सर रस्त्यावरून जाणाऱ्या एका भरधाव कारला समोरून येणाऱ्या डंपरने भीषण धडक दिली. या अपघाताची भीषणता इतकी प्रचंड होती की, कारचा जागीच अक्षरशः चक्काचूर झाला. या दुर्दैवी घटनेत कारमधील 4 प्रवाशांचा मृत्यू झाला असून 3 जण गंभीर जखमी झाले आहेत. अपघाताची माहिती मिळताच स्थानिक पोलिसांनी तातडीने घटनास्थळी धाव घेतली आणि कारमध्ये अडकलेल्या लोकांना बाहेर काढण्यासाठी हायड्रा यंत्राची मदत घेऊन बचावकार्य राबवले.
उपचारादरम्यान दोघांनी सोडले प्राण; मृतांमध्ये चालकाचाही समावेश
हा भीषण अपघात सोमवारी रात्री सुमारे 10.15 वाजण्याच्या सुमारास घडला. या कारमधून एकूण 7 प्रवासी प्रवास करत होते. अपघाताच्या वेळी झालेल्या भीषण धडकेत चालक आदेश कुमार आणि निशा यांचा जागीच करुण अंत झाला. घटनेनंतर पोलिसांनी सर्व जखमींना तातडीने जवळच्या रुग्णालयात दाखल केले; मात्र उपचारादरम्यान आणखी दोघांनी प्राण गमवालयाने या दुर्घटनेतील एकूण मृतांची संख्या 4 वर पोहोचली आहे. सध्या उर्वरित 3 जखमींवर रुग्णालयात वैद्यकीय उपचार सुरू असून त्यांची प्रकृती चिंताजनक असल्याचे समजते.
वरिष्ठ अधिकाऱ्यांकडून घटनास्थळाची पाहणी
मुजफ्फरनगरचे वरिष्ठ पोलीस अधीक्षक संजय कुमार वर्मा, एसपी सिटी अमृत जैन, एसपी ट्रॅफिक अतुल कुमार चौबे आणि क्षेत्राधिकारी सुनील कुमार यांनी तातडीने घटनास्थळाला भेट देऊन पाहणी केली. वरिष्ठ अधिकाऱ्यांनी बचावकार्याचा आढावा घेत जखमींना वैद्यकीय मदत मिळवून देण्याचे निर्देश दिले. या प्रकरणी पोलिसांनी तात्काळ कारवाई करत अपघातग्रस्त डंपर जप्त केला असून चालकाला ताब्यात घेतले आहे. घटनेची माहिती मिळताच पीडित कुटुंबीयांवर मोठा आघात झाला असून पोलीस या प्रकरणी पुढील कायदेशीर तपास करत आहेत.
