NEET-PG 2026 चा निकाल जाहीर; ‘या’ संकेतस्थळावर तपासा निकाल

NEET PG Result 2026: देशातील वैद्यकीय पदव्युत्तर (MD/MS/DNB) अभ्यासक्रमांच्या प्रवेशासाठी अत्यंत महत्त्वाची मानली जाणारी ‘NEET-PG 2026’ परीक्षेचा निकाल अखेर जाहीर करण्यात आला आहे. ‘नॅशनल बोर्ड ऑफ एक्झामिनेशन्स इन मेडिकल सायन्सेस’ (NBEMS) ने हा निकाल आपल्या अधिकृत संकेतस्थळावर प्रसिद्ध केला आहे. या परीक्षेला बसलेले सर्व उमेदवार बोर्डाच्या natboard.edu.in या अधिकृत संकेतस्थळाला भेट देऊन आपला निकाल आणि कट-ऑफ गुण पाहू शकतात.

श्रेणीनुसार जाहीर झालेले कट-ऑफ गुण

या वर्षीच्या निकालानंतर NBEMS ने विविध श्रेणींनुसार पात्रता गुण (कट-ऑफ पर्सेंटाइल) देखील जाहीर केले आहेत:

सामान्य (General) आणि EWS: परीक्षा उत्तीर्ण होऊन पात्र ठरण्यासाठी किमान २६२ गुण (५० वी पर्सेंटाइल) आवश्यक आहेत.

सामान्य PwBD (दिव्यांग श्रेणी): पात्रतेसाठी २४४ गुण (४५ वी पर्सेंटाइल) निश्चित करण्यात आले आहेत.

SC, ST आणि OBC श्रेणी: या प्रवर्गातील विद्यार्थ्यांना पात्र होण्यासाठी किमान २२६ गुण (४० वी पर्सेंटाइल) मिळवणे अनिवार्य आहे.

एकूण विद्यार्थी आणि परीक्षा केंद्रांचे नियोजन

या राष्ट्रीय पातळीवरील परीक्षेसाठी देशभरातून तब्बल २,६५,९६० विद्यार्थी उपस्थित राहिले होते. मुख्य परीक्षा ३० ऑगस्ट रोजी पार पडली होती. मात्र, जयपूरमधील एका परीक्षा केंद्रावर अचानक वीज पुरवठा खंडित झाल्यामुळे ज्या विद्यार्थ्यांचे पेपर सोडवणे प्रभावित झाले होते, त्यांच्यासाठी ५ सप्टेंबर रोजी फेरपरीक्षा आयोजित करण्यात आली होती. तज्ञांच्या सखोल पुनरावलोकनानंतर प्रश्नपत्रिकेतील कोणत्याही प्रश्नात कोणतीही त्रुटी आढळली नसल्याचे बोर्डाने स्पष्ट केले आहे.

१ ऑक्टोबरपासून गुणपत्रिका डाउनलोड करण्याची सुविधा

विद्यार्थी आगामी १ ऑक्टोबर २०२६ पासून त्यांचे वैयक्तिक स्कोरकार्ड (गुणपत्रिका) आणि उत्तरतालिका (answer keys) ऑनलाइन डाउनलोड करू शकतील. विशेष म्हणजे, ही गुणपत्रिका संकेतस्थळावर केवळ ६ महिन्यांच्या कालावधीसाठीच उपलब्ध राहणार आहे; त्यामुळे सर्व विद्यार्थ्यांनी वेळ काढून आपले स्कोरकार्ड डाउनलोड करून सुरक्षितपणे जतन करून ठेवावे, असा सल्ला बोर्डाकडून देण्यात आला आहे. याशिवाय, NEET-SS 2025 साठी पात्रतेची पर्सेंटाइल ५० वरून ३० पर्यंत कमी करण्यात आल्याची महत्त्वाची माहितीही समोर आली आहे.