जम्मू काश्मीर: दहशतवाद्यांना निधी पुरवणे आणि कट रचल्याप्रकरणी गुरुवारी सकाळी राष्ट्रीय तपास यंत्रणेने (एनआयए) काश्मीरमधील अनेक ठिकाणी छापे टाकले. अधिकृत सूत्रांनी सांगितले की, 'पोलिसांच्या मदतीने एनआयएच्या पथकाने दक्षिण काश्मीरमधील शोपियानमधील रेबन, निलदूरा आणि चेक-ए-चोलेंड, कुलगाममधील मंजगाम, देवसर, सोनिगाम आणि बुगम आणि पुलवामामधील भागांसह अनेक ठिकाणी छापे टाकले. त्याचप्रमाणे, उत्तर काश्मीरमधील सोपोर आणि कुपवाडा येथे छापे टाकण्यात आले होते. हा अहवाल दाखल होईपर्यंत कोणत्याही अटक किंवा जप्तीबाबत कोणतीही माहिती उपलब्ध नव्हती. अधिक तपशीलांची प्रतीक्षा आहे.'
एनआयएने छापे टाकलेल्या भागात अनेकदा दहशतवादी कारवाया झाल्याचे उघड झाले आहे. त्यामुळे एनआयएचे पथक या भागात छापे टाकत आहेत. पहलगाम हल्ल्यात सहभागी असलेले दहशतवादी अद्यापही सापडलेले नाहीत. त्यांचा शोध वेगाने सुरू आहे. संपूर्ण जम्मू आणि काश्मीर खोऱ्यात लष्करी दलांकडून शोध मोहीम राबवली जात आहे. जम्मू आणि काश्मीर पोलिस, भारतीय लष्कर, गुप्तचर संस्था मोठ्या प्रमाणात शोध मोहीम राबवत आहेत.
पाकिस्तानमधून कार्यरत असलेले गुप्तहेर नेटवर्क:
माहितीनुसार, भारतातील पाकिस्तानी एजंट्सच्या नेटवर्कचा पर्दाफाश करण्याच्या उद्देशाने हे छापे टाकण्यात आले होते. या प्रकरणातील संशयित आरोपी पाकिस्तानमधील एजंट्सच्या संपर्कात होते. त्यांनी भारतातील महत्त्वाची माहिती त्यांच्याशी शेअर केली, ज्याच्या बदल्यात त्यांना आर्थिक मोबदला मिळत होता. एनआयए २०२३ पासून पीआयओसोबत संवेदनशील माहिती शेअर करणाऱ्या व्यक्तींवर लक्ष ठेवून होती. या पार्श्वभूमीवर, एनआयएने 20 मे 2025 रोजी या प्रकरणात गुन्हा दाखल केला होता.
