पाकड्यांच्या कुरापती चालूच; पाकिस्तानकडून गुजराती मच्छिमारांच्या बोटींवर ताबा

नवी दिल्ली: पाकिस्ताननं अलीकडेच भारतीय हद्दीत शिरलेल्या गुजराती मच्छिमारांच्या अनेक बोटींवर ताबा घेतला आहे. विशेष म्हणजे, या बोटींवरील मच्छिमारांना मात्र काही वेळाने सोडून देण्यात आलं. मात्र या घटनेमुळे पुन्हा एकदा 26/11 च्या भीषण मुंबई हल्ल्याच्या आठवणी ताज्या झाल्या आहेत. त्यावेळीही दहशतवाद्यांनी भारतीय मच्छिमारांची बोट वापरून समुद्री मार्गे मुंबई गाठली होती.

संभावना व्यक्त केली जात आहे की, या बोटींना दहशतवादी हल्ल्यांसाठी वापरण्याचा कट आखला जात आहे. या पार्श्वभूमीवर नौदल, कोस्ट गार्ड आणि सुरक्षा यंत्रणा अत्यंत सतर्क झाल्या आहेत. नौदलाकडून सर्व भारतीय मच्छिमारांना तात्पुरता समुद्रात न जाण्याचा आदेश दिला आहे. ही सावधगिरी बाळगण्याची वेळ असून, देशाच्या सुरक्षेच्या दृष्टीने हे पाऊल अत्यंत आवश्यक मानले जात आहे.

हेही वाचा: भारत-पाक तणावाच्या पार्श्वभूमीवर दिल्लीत हाय अलर्ट; सरकारी कर्मचाऱ्यांच्या रजा रद्द, सुरक्षा यंत्रणा सतर्क

मुंबईसह किनारपट्टीवरच्या प्रमुख शहरांमधील मच्छिमार संघटनांसोबत वरिष्ठ अधिकाऱ्यांनी बैठका घेतल्या आहेत. मच्छिमारांना संशयास्पद हालचाली दिसल्यास तात्काळ प्रशासनाशी संपर्क साधण्याच्या सूचना देण्यात आल्या आहेत.

याशिवाय नौदलाकडून सीमारेषेपासून काही अंतरावर एक स्पष्ट वर्तनरेषा आखण्यात आली आहे. त्यापलीकडे कोणीही गेल्यास 'शूट टू किल' म्हणजेच थेट गोळीबार करण्याचे आदेश देण्यात आले आहेत. यामुळे किनारपट्टीवर पुन्हा एकदा तणावाचं वातावरण निर्माण झालं आहे.

सुरक्षेच्या दृष्टीने ही घटना गंभीर मानली जात आहे. कारण पाकिस्तानकडून वारंवार सीमांचे उल्लंघन, तसेच मच्छिमारांच्या बोटींवर कब्जा घेणे, हे भारताच्या सुरक्षिततेला मोठं आव्हान आहे. सध्या हे प्रकरण केवळ मासेमारीपुरतं मर्यादित आहे की यामागे आणखी काही षड्यंत्र आहे, याची सखोल चौकशी सुरू आहे.

भारतीय नौदल, कोस्ट गार्ड आणि गुप्तचर यंत्रणा या घटनेचा गांभीर्याने तपास करत आहेत. देशाची सीमा सुरक्षित राखण्याचं मोठं आव्हान सध्या केंद्र सरकारपुढं आहे. ताज्या घडामोडी पाहता, 26/11 सारखी घटना पुन्हा घडू नये, यासाठी देश सज्ज असल्याचं चित्र आहे. मात्र, समुद्री सुरक्षेचा प्रश्न पुन्हा ऐरणीवर आला आहे हे निश्चित.

या पार्श्वभूमीवर केंद्र सरकारकडून लवकरच उच्चस्तरीय बैठक घेऊन सुरक्षा यंत्रणांना अधिक साधनं व अधिकार देण्याची शक्यता आहे. देशवासीयांना सावध आणि जागरूक राहण्याचं आवाहनही करण्यात आलं आहे.