फुकेत–मुंबई या विमानप्रवासादरम्यान शुक्रवारी रात्री एका प्रवाशाने शौचालयात सिगारेट पेटवल्याने विमानात गोंधळ उडाला. शौचालयातून धूर बाहेर येताना दिसताच प्रवासी आणि कर्मचारी वर्ग घाबरून गेले आणि काही काळ तणावपूर्ण परिस्थिती निर्माण झाली. अधिकाऱ्यांनी दिलेल्या माहितीनुसार, अटक करण्यात आलेला प्रवासी भव्या गौतम जैन (वय 25) हा मुंबईतील नेपन्सी रोड येथील रहिवासी आहे. उड्डाणादरम्यान शौचालयातून धूर दिसल्याने विमानात खळबळ उडाली. तत्काळ तपासणी करून परिस्थिती नियंत्रणात आणण्यात आली.
विमान मुंबईच्या छत्रपती शिवाजी महाराज आंतरराष्ट्रीय विमानतळावर उतरल्यावर जैन याला सुरक्षा अधिकाऱ्यांनी ताब्यात घेतलं आणि नंतर पोलिसांच्या स्वाधीन केलं. चौकशीत समोर आलं की, विमानात स्पष्टपणे धूम्रपानास बंदी असतानाही जैन याने शौचालयात सिगारेट पेटवली होती. पोलीस अधिकाऱ्यांनी सांगितले की, जैन याच्यावर विमान अधिनियम (Aircraft Act) अंतर्गत संबंधित कलमान्वये गुन्हा दाखल करण्यात आला आहे. देशातील विमान सुरक्षा नियमांनुसार सर्व प्रवासी विमानांमध्ये धूम्रपान करण्यास सक्त मनाई आहे. कारण अशा कृतीमुळे प्रवासी आणि कर्मचारी वर्गाच्या सुरक्षेला गंभीर धोका निर्माण होऊ शकतो.
अधिकार्यांनी स्पष्ट केले की, अशा प्रकारचं वर्तन केवळ कायद्याचं उल्लंघन नाही, तर विमानप्रवासातील सुरक्षेलाही मोठं आव्हान आहे. गेल्या काही वर्षांत विमानात धूम्रपानाच्या घटना कमी झाल्या असल्या तरी अधूनमधून घडणाऱ्या अशा प्रकारांमुळे सतर्कतेची गरज अधोरेखित होते. एअरलाईनने नंतर प्रवाशांना खात्री दिली की सर्व सुरक्षा नियम पाळले गेले असून प्रवासादरम्यान कोणताही धोका निर्माण झाला नव्हता. दरम्यान, आरोपी पोलिस कोठडीत असून पुढील कारवाई विमान सुरक्षा नियम आणि फौजदारी कायद्यांनुसार केली जाणार आहे. ही घटना पुन्हा एकदा दाखवून देते की, विमानप्रवासातील किरकोळ नियमभंगही मोठ्या संकटाला आमंत्रण देऊ शकतो.
