Mann Ki Baat: पंतप्रधान नरेंद्र मोदी यांनी त्यांच्या लोकप्रिय रेडिओ कार्यक्रम 'मन की बात' च्या 137 व्या भागाद्वारे देशवासीयांशी संवाद साधला. या भाषणादरम्यान त्यांनी स्पष्ट केले की, 'मन की बात' हे नवीन उपक्रम आणि कल्पक प्रयत्न जगासमोर मांडण्याचे एक प्रभावी व्यासपीठ ठरले आहे. देशात तरुण निर्मात्यांची (क्रिएटर्सची) अजिबात कमतरता नाही, असे सांगत त्यांनी मुंबईतील कृष्णा शेषाद्री यांनी विकसित केलेल्या 'bharatrajya.com' या संकेतस्थळाचा विशेष उल्लेख केला. तरुणांनी ऐतिहासिक माहिती सहजपणे मिळवण्यासाठी या संकेतस्थळाला नक्की भेट द्यावी, असे आवाहन त्यांनी केले. या वेबसाईटवर कोणतेही वर्ष निवडल्यास, त्या काळात भारताच्या कोणत्या भागावर कोणाचे राज्य होते, हे रंजक पद्धतीने जाणून घेता येते. हा उपक्रम केवळ इतिहासाच्या विद्यार्थ्यांनाच नव्हे, तर प्रत्येकाला इतिहास शिकण्यासाठी अत्यंत उपयुक्त ठरेल, असा विश्वास त्यांनी व्यक्त केला.
'नशामुक्त भारत' मोहिमेत सहभागाचे आवाहन अन् 'पीएम स्वनिधी' योजनेतून महिला सक्षमीकरण
आपल्या संबोधनात पंतप्रधान मोदींनी सर्वांना एकत्र येऊन नशामुक्त भारत घडवण्यासाठी योगदान देण्याचे आवाहन केले. 'विकसित भारतासाठी अंमली पदार्थमुक्त युवा' ही मोहीम वेगाने जोर धरत असून देशातील तरुण पिढीला निरोगी व उज्ज्वल भविष्याकडे नेणे हा याचा मुख्य उद्देश आहे. अंमली पदार्थांचे व्यसन केवळ एका व्यक्तीलाच नव्हे, तर संपूर्ण कुटुंब आणि समाजाला उद्ध्वस्त करते, यावर त्यांनी भर दिला. यासोबतच, 'पीएम स्वनिधी योजने'चा उल्लेख करताना त्यांनी सांगितले की, या योजनेच्या लाभार्थ्यांपैकी सुमारे 46 टक्के महिला आहेत. म्हणजेच देशभरातील सुमारे 35 लाख महिला या योजनेच्या माध्यमातून स्वतःचा व्यवसाय वाढवून स्वावलंबी होत आहेत. महिला सक्षमीकरणाच्या या महत्त्वपूर्ण पैलूवर अधिक चर्चा होण्याची गरज त्यांनी व्यक्त केली.
'मिशन शक्तीसॅट' द्वारे विद्यार्थिनींना अंतराळ तंत्रज्ञानाचे धडे
अंतराळ क्षेत्रातील प्रगतीचा उल्लेख करताना पंतप्रधान मोदींनी 'मिशन शक्तीसॅट' (Mission ShaktiSAT) या नाविन्यपूर्ण मोहिमेची माहिती दिली. या उपक्रमाद्वारे 108 देशांमधील तब्बल 12,000 विद्यार्थिनींना उपग्रह तंत्रज्ञान (सॅटेलाइट टेक्नॉलॉजी) शिकण्याची आणि नावीन्यपूर्ण संशोधनात प्रगती करण्याची सुवर्णसंधी मिळत आहे. या मोहिमेची एक सुंदर झलक 23 ऑगस्ट रोजी म्हणजेच 'राष्ट्रीय अंतराळ दिना'च्या (National Space Day) निमित्ताने उत्तर प्रदेशातील ग्रेटर नोएडा येथे पाहायला मिळाली होती, असे सांगत त्यांनी देशातील बालवैज्ञानिकांचे कौतुक केले.
