Purvanchal Expressway Accident: उत्तरप्रदेशातील सुलतानपूर जिल्ह्यात पूर्वांचल एक्स्प्रेस वेवर बुधवारी पहाटे 5 च्या सुमारास अत्यंत दुर्दैवी आणि भीषण रस्ते अपघात घडला. लखनऊ येथून देवरियाच्या दिशेने भरधाव वेगात जाणाऱ्या एका कारने महामार्गावरील ट्रकला पाठीमागून जोरदार धडक दिली. या भीषण अपघातात कारमधून प्रवास करणाऱ्या 6 खेळाडूंपैकी 3 टेनिसपटूंचा प्रचंड रक्तस्रावामुळे जागीच दुर्दैवी अंत झाला. तर उर्वरित 3 खेळाडू गंभीर जखमी झाले असून त्यांच्यावर शासकीय वैद्यकीय रुग्णालयात उपचार सुरू आहेत. अपघाताच्या वेळी कारचा वेग तब्बल 100 किमी प्रतितास असल्याचे पोलिसांच्या प्राथमिक तपासात उघड झाले आहे.
पोलिसांकडून तातडीने बचावकार्य; जखमींना वैद्यकीय महाविद्यालयात हलवले
धडक इतकी भीषण होती की कारच्या पुढील भागाचा पुरता चक्काचूर झाला होता. अपघाताची माहिती मिळताच स्थानिक पोलिसांनी तातडीने घटनास्थळी पोहोचून बचावकार्य सुरू केले. कारमध्ये अडकलेल्या जखमींना बाहेर काढून प्रथम शैय्या संयुक्त चिकित्सालयात दाखल करण्यात आले. मात्र, त्यांची प्रकृती अत्यंत चिंताजनक असल्याने डॉक्टरांनी त्यांना पुढील उपचारासाठी दर्शननगर येथील वैद्यकीय महाविद्यालयात हलवण्याचा सल्ला दिला. मृत खेळाडूंचे मृतदेह पोलिसांनी ताब्यात घेऊन शवविच्छेदनासाठी पाठवले आहेत.
हेही वाचा – मुख्यमंत्र्यांच्या कार्यलयावर आधी ED चे छापे, आता तपास CBI च्या हाती; लाचखोरीप्रकरणी 6 जणांवर गुन्हा दाखल
पोलिसांकडून ट्रक चालकाचा शोध सुरू
या दुर्दैवी अपघातात नित्या प्रजापती (वय 22 वर्षे), इरफान अंसारी (वय 20 वर्षे) आणि अनिकेत (वय 24 वर्षे) या तीन नवोदित खेळाडूंचा जागीच मृत्यू झाला. तर आनंद यादव (वय 23 वर्षे), राजू यादव (वय 22 वर्षे) आणि जयंतो शर्मा (वय 30 वर्षे) हे गंभीर जखमी झाले असून त्यांच्यावर वैद्यकीय पथकाकडून उपचार केले जात आहेत. अपघाताचे नेमके कारण अद्याप स्पष्ट झालेले नसून, पोलीस या प्रकरणाचा सखोल तपास करत आहेत आणि घटनास्थळावरून पसार झालेल्या ट्रक चालकाचा शोध घेत आहेत.
