कुपवाडामध्ये भीषण रस्ते अपघात; वाहन दरीत कोसळून 5 जणांचा मृत्यू, 6 जण जखमी

Kupwara Accident: जम्मू-काश्मीरमधील कुपवाडा जिल्ह्यातील करनाह भागात सोमवारी एक भीषण रस्ते अपघात घडला आहे. एक वाहन अचानक अनियंत्रित होऊन खोल दरीत कोसळल्याने या दुर्घटनेत 5 जणांचा जागीच मृत्यू झाला असून, अन्य 6 जण गंभीर जखमी झाले आहेत. मृतांमध्ये पुरुष, महिला आणि लहान मुलांचा समावेश असल्याचे समजते. अपघाताची माहिती मिळताच स्थानिक नागरिक आणि प्रशासकीय यंत्रणेने तातडीने बचावकार्य सुरू केले. जखमींना उपचारासाठी त्वरित नजीकच्या रुग्णालयात हलवण्यात आले असून, प्रकृती गंभीर असलेल्या जखमींना पुढील उपचारांसाठी जीएमसी (GMC) हंदवारा येथे पाठवण्यात आले आहे.

उपराज्यपालांकडून तीव्र शोक व्यक्त

जम्मू-काश्मीरचे उपराज्यपाल मनोज सिन्हा यांनी या दुर्दैवी अपघाताबद्दल तीव्र शोक व्यक्त केला आहे. कुपवाड्यातील रस्ते अपघातात झालेल्या जीवितहानीमुळे आपल्याला अतीव दुःख झाल्याचे त्यांनी आपल्या संदेशात म्हटले आहे. मृतांच्या शोकाकुल कुटुंबीयांच्या प्रति त्यांनी सहवेदना व्यक्त केल्या आहेत, तसेच सर्व जखमी लवकरात लवकर बरे व्हावेत, यासाठी प्रार्थना केली आहे. याशिवाय, जिल्हा प्रशासनाला निर्देश देत जखमींवर सर्वोत्तम आणि तातडीने वैद्यकीय उपचार करण्याचे आदेश देण्यात आले आहेत.

पुंछमध्येही घडली होती अशीच दुर्घटना

गेल्या महिन्यात, जम्मू-काश्मीरमधीलच पुंछ जिल्ह्यातील सुरनकोट येथील शेलधर भागात अशाच प्रकारचा एक भीषण रस्ते अपघात घडला होता. चालकाचे नियंत्रण सुटल्याने एक वाहन खोल दरीत कोसळले होते, ज्यामध्ये दोन महिलांसह 6 जणांचा मृत्यू झाला होता. या अपघातात आणखी तिघे जण जखमी झाले होते, त्यांना उपचारासाठी रुग्णालयात दाखल करण्यात आले होते. जखमींपैकी एका तरुणीची प्रकृती चिंताजनक असल्याचे डॉक्टरांनी सांगितले होते.

घटनास्थळी रुग्णवाहिका सेवा, अतिरिक्त आपत्कालीन पथके आणि इतर यंत्रणांनी त्वरित पोहोचून मदतकार्य राबवले होते. पुंछचे उपायुक्त अशोक कुमार शर्मा यांनी या अपघातात 6 जणांचा मृत्यू झाल्याची आणि तिघे जखमी झाल्याची पुष्टी केली होती. तसेच, पुंछचे मुख्य वैद्यकीय अधिकारी (CMO) डॉ. परवेझ खान यांनी सांगितले होते की, मृतांमध्ये चार पुरुष आणि दोन महिलांचा समावेश होता आणि त्या सर्वांचे वय 20 ते 25 वर्षांच्या दरम्यान होते.

हेही वाचा – उज्जैनमध्ये शाही मशिदीच्या कारवाईवरून तणावाचा भडका; जमाव-पोलिसांत संघर्ष, अश्रुधुराच्या नळकांड्या फोडल्या, परिसराला छावणीचं स्वरूप

दरम्यान, या घटनेवर दुःख व्यक्त करताना जम्मू-काश्मीरचे मुख्यमंत्री ओमर अब्दुल्ला यांच्या कार्यालयाने म्हटले होते की, सुरनकोट येथील अपघातातील जीवितहानी अत्यंत वेदनादायक असून, पीडित कुटुंबांना सर्वतोपरी मदत पोहोचवण्यासाठी मुख्यमंत्र्यांचे कार्यालय संबंधित अधिकाऱ्यांच्या सतत संपर्कात आहे.