शाब्बास नवरोबा! औक्षणाच्या ताटात हुंड्याचे 31 लाख रुपये, नवरामुलगा म्हणाला, ‘अहो, मला तर फक्त इतकेच…’

Groom Returns Dowry in UP : सध्याच्या काळात मुले-मुली आणि त्यांचे कुटुंबीय शिकलेले असतानाही हुंडाबळीच्या (Dowry) घटना ऐकायला-पाहायला मिळतात. अनेकदा अत्यंत सुशिक्षित, उच्चभ्रू आणि श्रीमंत घराण्यांमध्ये हा प्रकार मोठ्या प्रमाणात घडताना दिसतो. एकीकडे अशा घटनांच्या बातम्या येत असताना, आग्रा (Agra) येथे एक अत्यंत सकारात्मक आणि अनोखी घटना घडली आहे. मुजफ्फरनगरच्या अवधेश राणा नावाच्या 26 वर्षीय नवरदेवाने लग्नात नवरीच्या घरच्यांनी स्वेच्छेने दिलेला तब्बल 31 लाख रुपयांचा हुंडा (Dowry) स्पष्टपणे नाकारला आहे. अवधेशच्या या निर्णयामुळे संपूर्ण गावभर आणि परिसरात त्याच्या अजब निर्णयाची चर्चा सुरू आहे.

वडिलांनी मुलीच्या लग्नासाठी हुंडा जमवला होता
या घटनेतील वधू अदिती सिंग हिचे वय 24 वर्षे आहे. दुर्दैवाने, अदितीच्या वडिलांचे सुनील सिंह यांचे कोविड (Covid) महामारी दरम्यान निधन झाले होते. आपल्या मुलीच्या भविष्यातील विवाहासाठी त्यांनी खूप मोठी रक्कम मेहनतीने साठवून ठेवली होती. लग्नातील 'तिलक' (Tilak) विधीवेळी, अदितीच्या घरच्यांनी पूजेच्या ताटात ही 31 लाख रुपयांची रोख रक्कम अत्यंत आकर्षकपणे सजवून ठेवली होती.

"मला घेण्याचा हक्क नाही"
तिलक विधी सुरू असतानाच, अवधेशने ताटातील पैशांना स्पष्टपणे नकार दिला. त्याने उपस्थित पाहुण्यांना उद्देशून सांगितले, "हे तिच्या (अदितीच्या) वडिलांनी कष्ट करून जमवलेले पैसे आहेत. तिच्या भविष्यासाठी त्यांनी हे साठवले आहेत. मला हे 31 लाख रुपये घेण्याचा काहीच हक्क (Right) नाही." अवधेशचे हे शब्द ऐकून समारंभातील सर्व पाहुणे काही क्षणांसाठी स्तब्ध झाले होते. अखेरीस, त्याने केवळ 1 रुपया 'शकुन' (Shakun) म्हणून स्वीकारून विधी पूर्ण केला, ज्यामुळे या घटनेने सामाजिक संदेश दिला.

हेही वाचा – Anti Polygamy Bill : पुरुषांनो! एकापेक्षा जास्त लग्न कराल तर भोगावा लागेल कारावास; या विधेयकाला मिळाली मंजुरी

अवधेशचे कुटुंब हुंड्याच्या विरोधात
एका वृत्तसंस्थेशी बोलताना अवधेश राणा, जो नागावा गावातील एक व्यापारी (Businessman) आहे, त्याने सांगितले की त्याचा विवाह 22 तारखेला अदिती सिंगसोबत झाला. अदितीच्या घरच्यांनी 31 लाख रुपये हुंडा घेण्याचा आग्रह केला होता. मात्र, तो आणि त्याचे संपूर्ण कुटुंब हुंड्याच्या प्रथेच्या विरोधात असल्यामुळे त्यांनी ती रक्कम स्वीकारण्यास नकार दिला.

अदितीचे शिक्षण आणि आजोबांचा निर्णय
अदितीची आई सीमा देवी या सहारणपूरमधील राणखंडी गावच्या मूळ रहिवासी आहेत. पतीच्या निधनानंतर त्या अदिती आणि तिच्या लहान भावासह शहाबुद्दीनपूर गावात असलेल्या माहेरी राहत होत्या. वडिलांच्या निधनानंतरही अदितीने आपले शिक्षण पूर्ण केले आणि ती एमएससी (M.Sc.) झाली. त्यानंतर तिच्या आजोबांनी परंपरेनुसार 'अरेंज्ड मॅरेज' (Arranged Marriage) ठरवत तिचे लग्न अवधेशसोबत जुळवले होते.

हेही वाचा – India GDP Growth: भारताच्या अर्थव्यवस्थेत तेजी! दुसऱ्या तिमाहीत जीडीपीमध्ये 8.2 टक्क्यांची वाढ