Expensive Egg: लडाखमधील लेह जिल्ह्यामध्ये माणुसकीचे एक अनोखे आणि प्रेरणादायी दर्शन घडले आहे. इराणमध्ये सुरू असलेल्या संघर्षात पीडित ठरलेल्या नागरिकांना आणि विशेषतः चिमुकल्यांना मदत करण्यासाठी लेहच्या जनतेने पुढाकार घेतला आहे. या मदतीसाठी आयोजित करण्यात आलेल्या एका लिलावात अवघ्या 10 रुपयांच्या अंड्याला 25,000 रुपयांची बोली लागली. या घटनेची सध्या देशभर चर्चा होत असून, एका अंड्यासाठी एवढी मोठी रक्कम मोजण्यामागे एक भावनिक आणि सामाजिक उद्दिष्ट असल्याचे समोर आले आहे.
इराणमधील पीडितांच्या मदतीसाठी अनोखा लिलाव
इराणमधील सध्याची तणावपूर्ण आणि संघर्षमय परिस्थिती पाहता, तिथल्या गरजू लोकांना आर्थिक बळ देण्यासाठी लेहमध्ये एका विशेष लिलावाचे आयोजन करण्यात आले होते. एका मोकळ्या मैदानात पार पडलेल्या या उपक्रमात स्थानिक नागरिकांनी मोठी गर्दी केली होती. या लिलावादरम्यान बोली लावण्याची प्रक्रिया सुरू असताना, बाजारात केवळ 10 रुपये किंमत असलेल्या एका अंड्यासाठी उपस्थितांनी चढाओढ लावली. अखेर हे अंडे 25,000 रुपयांच्या विक्रमी किमतीला विकले गेले.
“मुलांवरील अत्याचाराचा निषेध करण्यासाठी मोजली मोठी किंमत”
स्थानिक रहिवासी शब्बीर हुसेन यांनी ही अंडी 25,000 रुपयांना खरेदी केली. आपल्या या निर्णयाचे समर्थन करताना ते म्हणाले, “एका अंड्याचा बाजारभाव 10 रुपये असतो हे सर्वांनाच ठाऊक आहे. मात्र, मी ही मोठी रक्कम यासाठी मोजली कारण इराणमध्ये निष्पाप मुलांवर अत्यंत क्रूर अत्याचार होत आहेत. हा अत्याचार थांबवावा आणि आमचा पाठिंबा त्यांच्या पाठीशी आहे, हा संदेश जगापर्यंत पोहोचवण्यासाठी आम्ही हा खारीचा वाटा उचलला आहे.”
‘गरज पडल्यास प्राण द्यायलाही तयार’
शब्बीर हुसेन यांनी यावेळी अत्यंत भावनिक उद्गार काढले. ते म्हणाले, “इराणमधील पीडितांच्या न्यायासाठी आणि मदतीसाठी आम्ही केवळ पैसेच नाही, तर आमचे प्राण द्यायलाही तयार आहोत. आम्ही समाजाचे देणे लागतो आणि आमच्या नेत्यांनी दिलेल्या प्रत्येक आदेशाचे आम्ही पालन करू. सद्यस्थितीत आम्हाला फक्त मदतीचे आवाहन करण्यात आले आहे आणि आम्ही ते पूर्ण ताकदीने करत आहोत.”
हेही वाचा – IAS Tukaram Mundhe: परंपरांना छेद देणारा आदर्श; IAS तुकाराम मुंढेंनी आईच्या अस्थी वाहिल्या नाहीत तर केलं…
#WATCH | Leh, Ladakh: People of Leh district give different types of donations for Iran victims. During this, one egg was auctioned for Rs 25 thousand. A local resident, Shabir Hussain, says, "… Everyone knows that the price of an egg is Rs 10. I didn't pay Rs 25 thousand… pic.twitter.com/yGSD4NVXRc — ANI (@ANI) April 5, 2026
दागिन्यांपासून अन्नधान्यापर्यंत दातृत्वाचा ओघ
लेहमध्ये सुरू असलेल्या या मदत मोहिमेत केवळ लिलावच नाही, तर लोक उत्स्फूर्तपणे विविध वस्तूंचे दान करत आहेत. यामध्ये रोख रक्कम, सोन्या-चांदीचे दागिने, अन्नधान्य आणि जीवनावश्यक वस्तूंचा समावेश आहे. या सर्व देणग्या जमा करून त्या इराणमधील गरजू लोकांपर्यंत पोहोचवण्याचा प्रामाणिक प्रयत्न स्थानिक संस्थांकडून केला जात आहे. भौगोलिक सीमा ओलांडून माणुसकीसाठी धावून जाणाऱ्या लडाखच्या या जनतेचे सर्वत्र कौतुक होत आहे.
