Subko Cafe Bengaluru Customer Body Shaming Receipt Viral: बंगळुरूमधील अत्यंत लोकप्रिय असलेल्या 'सबको' (Subko) कॅफेमध्ये एका ग्राहकाचा त्याच्या शारीरिक बनावटीवरून अवमान केल्याचा धक्कादायक प्रकार समोर आला आहे. कॅफेमध्ये आलेल्या एका ग्राहकाला देण्यात आलेल्या बिलावर (Receipt) त्याचे नाव, टेबल नंबर किंवा ऑर्डरचा तपशील नोंदवण्याऐवजी कर्मचारी वर्गाने 'लिटल फॅट ब्लॅक शर्ट' (बुटका-जाडा, काळा शर्टवाला) असे लिहून बिल जनरेट केले. या अनादरयुक्त वागणुकीमुळे संतप्त झालेल्या ग्राहकाने त्या बिलाचा फोटो सोशल मीडियावर शेअर करत कॅफे प्रशासनाला जाहीर जाब विचारला.
सोशल मीडियावर तीव्र संताप; कर्मचाऱ्यांच्या वर्तनावर युजर्सचा हल्लाबोल
ग्राहकाने सोशल मीडियावर फोटो पोस्ट करत, 'ओळख पटवण्यासाठी माझे नाव किंवा टेबल नंबर विचारण्याऐवजी माझ्या शारीरिक रूपाचा वापर का केला गेला?' असा उद्विग्न प्रश्न उपस्थित केला. ही पोस्ट वाऱ्यासारखी व्हायरल झाली असून, नेटिझन्सनी सबको कॅफेच्या कर्मचाऱ्यांच्या या असंवेदनशील आणि अयोग्य वर्तनावर तीव्र संताप व्यक्त केला. बॉडी-शेमिंग करणाऱ्या कर्मचाऱ्यांवर आणि कॅफेच्या संस्कृतीवर युजर्सकडून मोठ्या प्रमाणावर टीका करण्यात आली.
वाद वाढताच कॅफेची जाहीर माफी; चुकीवर पांघरूण न घालण्याची भूमिका
प्रकरणाचे गांभीर्य लक्षात घेत आणि सोशल मीडियावरून वाढता दबाव पाहून सबको कॅफेने अधिकृत निवेदन जारी करून जाहीर माफी मागितली. 'काही चुका शांतपणे सुधारल्या जातात, तर काहींचा स्वीकार सर्वांसमोर करावा लागतो; कारण मौन बाळगल्याने अशा चुकीच्या संस्कृतीला खतपाणी मिळते. ज्या अतिथीसोबत हा प्रकार घडला, त्यांची आम्ही मनापासून माफी मागतो,' असे कॅफेने आपल्या निवेदनात स्पष्ट केले. कर्मचाऱ्याच्या या उघड चुकीवर पांघरूण घालण्याऐवजी उत्तरदायित्व स्वीकारणे जास्त महत्त्वाचे असल्याचेही कॅफेने म्हटले.
अंतर्गत समितीकडून चौकशी सुरू; कोणत्याही प्रकारच्या 'बॉडी-शेमिंग'चा निषेध
सबको कॅफे प्रशासनाने कोणत्याही प्रकारच्या बॉडी-शेमिंगचा कडक शब्दांत निषेध केला आहे. या संपूर्ण घटनेची चौकशी करण्यासाठी कॅफेची अंतर्गत तक्रार निवारण समिती (Internal Complaints Committee) काम करत असल्याचे त्यांनी सांगितले. योग्य ती कायदेशीर व शिस्तभंगविषयक कारवाई करण्यासाठी कॅफेने पीडित ग्राहकाला त्यांच्या बायोमध्ये दिलेल्या फॉर्मद्वारे अधिकृत तक्रार नोंदवण्याची विनंती केली आहे.
