EPFO Interest Rate: देशातील कोट्यवधी कर्मचाऱ्यांसाठी महत्त्वाची बातमी समोर आली आहे. EPFOने आर्थिक वर्ष 2025-26 साठी भविष्य निर्वाह निधी (PF) खात्यांवरील व्याजदर जाहीर केले आहेत. यंदाही व्याजदर 8.25 टक्केच कायम ठेवण्याचा निर्णय घेण्यात आला आहे. हा निर्णय सेंट्रल बोर्डाच्या बैठकीत घेण्यात आला असून आता तो अंतिम मंजुरीसाठी केंद्र सरकारकडे पाठवला जाणार आहे.
मागील आर्थिक वर्षातही पीएफवरील व्याजदर 8.25 टक्केच ठेवण्यात आला होता. त्यामुळे सलग दुसऱ्या वर्षी EPFO ने व्याजदरात कोणताही बदल केलेला नाही. 2022-23 मध्ये हा दर 8.15 टक्के होता, तर त्यानंतरच्या वर्षात त्यात किंचित वाढ करण्यात आली होती. मात्र सध्याच्या आर्थिक परिस्थितीचा विचार करता दर स्थिर ठेवण्याचा निर्णय घेण्यात आल्याचे संकेत मिळत आहेत.
हेही वाचा:EV Toll Tax: इलेक्ट्रिक वाहनांना खरंच टोल टॅक्स लागत नाही का? जाणून घ्या राष्ट्रीय महामार्ग आणि राज्यांचे नियम
पीएफ खाते हे कर्मचाऱ्यांसाठी दीर्घकालीन बचतीचे महत्त्वाचे साधन मानले जाते. प्रत्येक महिन्याला कर्मचाऱ्यांच्या पगारातून ठरावीक टक्केवारीने रक्कम वळती केली जाते आणि नियोक्त्याकडूनही तितकीच भर घातली जाते. या एकत्रित रकमेवर EPFO दरवर्षी व्याज देते. हे व्याज वार्षिक आधारावर जमा केले जाते, ज्यामुळे निवृत्तीच्या वेळी कर्मचाऱ्यांना मोठी रक्कम मिळते.
व्याजदर स्थिर ठेवण्याचा निर्णय काही कर्मचाऱ्यांसाठी निराशाजनक वाटू शकतो, कारण दर वाढल्यास परतावा अधिक मिळतो. मात्र सध्याच्या गुंतवणूक वातावरणात 8.25 टक्के हा दर तुलनेने स्पर्धात्मक मानला जात आहे. बँकांच्या अनेक दीर्घकालीन ठेवींवर यापेक्षा कमी व्याज मिळत असल्याने पीएफ हा अजूनही सुरक्षित आणि फायदेशीर पर्याय ठरतो.
हेही वाचा:Defense Stocks : इराण-इस्रायल युद्धादरम्यान शेअर बाजारात मोठी पडझड, पण डिफेन्स शेअर्समध्ये तेजी; कोणत्या कंपन्यांचे अच्छे दिन?
सेंट्रल बोर्डाने घेतलेला हा निर्णय आता अर्थ मंत्रालयाच्या मंजुरीनंतर अधिकृतपणे लागू होईल. मंजुरी मिळाल्यानंतर संबंधित आर्थिक वर्षासाठीचे व्याज सर्व खात्यांमध्ये जमा केले जाईल. याचा थेट फायदा सरकारी तसेच खासगी क्षेत्रातील कोट्यवधी कर्मचाऱ्यांना होणार आहे.
तज्ज्ञांच्या मते, पीएफमध्ये नियमित गुंतवणूक केल्यास दीर्घकालीन संपत्ती निर्माण करण्यास मोठी मदत होते. चक्रवाढ व्याजाचा फायदा मिळाल्यामुळे वर्षानुवर्षे बचतीची रक्कम वाढत जाते. त्यामुळे नोकरी करणाऱ्या प्रत्येकाने आपल्या पीएफ खात्याची नियमित तपासणी करून योगदान सुरू ठेवणे महत्त्वाचे आहे..