Income Tax Update 2026 : आयकर विभागाने करदात्यांसाठी एक दिलासादायक बातमी दिली असून, ई-फाइलिंग पोर्टलवर एक अत्यंत महत्त्वाचे नवीन फीचर समाविष्ट करण्यात आले आहे. या नवीन बदलामुळे करदात्यांना आता जुन्या आणि क्लिष्ट प्रक्रियेतून मुक्ती मिळणार असून, सुधारणेसाठीचे अर्ज करणे अधिक सोपे झाले आहे.
काय आहे हे नवीन फीचर?
आतापर्यंत प्राप्तिकराच्या विशिष्ट आदेशांमध्ये काही सुधारणा करायची असल्यास करदात्यांना प्रत्यक्ष सरकारी कार्यालयात जावे लागत असे किंवा मॅन्युअल प्रक्रिया पूर्ण करावी लागत होती. मात्र, आता TP (ट्रान्सफर प्राइसिंग), DRP (डिस्प्यूट रेझोल्यूशन पॅनल) आणि रिव्हिजन ऑर्डरशी संबंधित सुधारणेसाठीचे अर्ज (Rectification Application) थेट ई-फाइलिंग पोर्टलवर ऑनलाइन सादर करता येणार आहेत. यासाठी आता असेसिंग ऑफिसर (AO) कडे वारंवार चकरा मारण्याची गरज उरणार नाही.
अर्ज करण्याची सोपी पद्धत
करदात्यांनी या नवीन सुविधेचा लाभ घेण्यासाठी खालीलप्रमाणे प्रक्रिया करावी:
– सर्वात आधी अधिकृत e-Filing पोर्टलवर लॉग-इन करा.
– त्यानंतर मुख्य मेनूमध्ये असलेल्या Services या टॅबवर क्लिक करा.
– तिथे तुम्हाला आता Rectification नावाचा नवीन पर्याय दिसेल.
– या पर्यायामध्ये गेल्यावर Request to AO seeking rectification हा पर्याय निवडून तुम्ही तुमचा अर्ज ऑनलाइन सबमिट करू शकता.
– डिजिटल इंडियाच्या दिशेने महत्त्वाचे पाऊल
तज्ज्ञांच्या मते, हा बदल करदात्यांसाठी वेळेची मोठी बचत करणारा ठरेल. या फीचरमुळे रेक्टिफिकेशनची प्रक्रिया पूर्णपणे पारदर्शक आणि डिजिटल झाली आहे. आता अर्ज थेट संबंधित कर प्राधिकरणाकडे पोहोचेल, जे मूळ आदेशातील त्रुटी ऑनलाइन दुरुस्त करू शकतील. यामुळे करदाता आणि विभाग या दोघांमधील गुंतागुंत कमी होणार आहे.
2026 सालाच्या सुरुवातीला झालेला हा बदल म्हणजे कर प्रणाली अधिक सुलभ आणि लोकाभिमुख करण्याच्या दिशेने उचललेले महत्त्वाचे पाऊल मानले जात आहे.
