MPSC Interview Postponed: महाराष्ट्र लोकसेवा आयोगाच्या (MPSC) परीक्षांमधील प्रश्नपत्रिका फुटीच्या गंभीर प्रकरणाच्या पार्श्वभूमीवर, राज्यसेवा 2025 च्या मुलाखती पुढे ढकलण्याचा अधिकृत निर्णय आयोगाने घेतला आहे. या निर्णयामुळे गेल्या अनेक दिवसांपासून चिंतेत असलेल्या लाखो उमेदवारांना काही प्रमाणात दिलासा मिळाला असला, तरी कमी गुण मिळालेल्या विद्यार्थ्यांकडून उत्तरपत्रिकांच्या फेरतपासणीची मागणी आता अधिक तीव्र झाली आहे. ठराविक विद्यार्थ्यांच्या मुलाखती पुढे ढकलल्या जात असल्याचा आरोप करत मुख्य परीक्षेत उत्तीर्ण झालेल्या इतर अनेक विद्यार्थ्यांनी आयोगाकडे या संपूर्ण प्रकरणाबाबत तक्रारी दाखल केल्या आहेत. यामुळे 2025 च्या भरती प्रक्रियेबाबत सध्या परीक्षार्थींमध्ये मोठ्या प्रमाणावर संभ्रमाचे वातावरण निर्माण झाले आहे.
हेही वाचा – SET EXAM 2026: सलग तिसऱ्यांदा SET परीक्षेची तारीख बदलली, विद्यार्थ्यांमध्ये नाराजी..
मुलाखतींच्या अनिश्चिततेमुळे विद्यार्थी द्विधा मनःस्थितीत
आयोगाने जारी केलेल्या माहितीनुसार, 21 ते 24 सप्टेंबर आणि 26 व 28 सप्टेंबर 2026 या कालावधीत आयोजित केलेला मुलाखत कार्यक्रम प्रशासकीय कारणास्तव पुढे ढकलण्यात आला आहे. मुख्य परीक्षा पुढे ढकलून नव्या आणि सुरक्षित प्रश्नपत्रिकांसह पुन्हा परीक्षा घ्यावी, अशी मागणी विद्यार्थ्यांनी लावून धरली होती. प्रश्नपत्रिका फुटीची चौकशी आणि फेरतपासणी पूर्ण होईपर्यंत मुलाखती थांबवण्यात येतील, अशी ग्वाही राज्याचे मुख्यमंत्री देवेंद्र फडणवीस यांनीही दिली होती. मात्र, आयोगाकडून वेळेवर अधिकृत परिपत्रक न आल्याने नियोजित मुलाखतींबाबत विद्यार्थी अत्यंत अडचणीत सापडले होते. ‘मुलाखतीची तयारी करायची की आगामी मुख्य परीक्षेचा अभ्यास करायचा?’ असा मोठा प्रश्न त्यांच्यासमोर उभा राहिला होता.
सुधारित वेळापत्रक लवकरच जाहीर होणार; आयोगाचे स्पष्टीकरण
एमपीएससीने बुधवारी एक अधिकृत प्रसिद्धिपत्रक जारी करून मुलाखती पुढे ढकलल्याच्या वृत्तावर शिक्कामोर्तब केले आहे. राज्यसेवा मुख्य परीक्षा 2026 च्या प्रश्नपत्रिकांच्या सुरक्षिततेबाबत उमेदवारांच्या मनात निर्माण झालेला संशय दूर करण्यासाठी आणि पारदर्शकता जपण्यासाठी हा निर्णय घेण्यात आल्याचे मानले जात आहे. प्रशासकीय कारणांमुळे ही स्थगिती देण्यात आली असून, मुलाखतींचा नवीन आणि सुधारित कार्यक्रम स्वतंत्रपणे प्रसिद्ध केला जाईल, असे स्पष्टीकरण आयोगाने दिले आहे. तोपर्यंत विद्यार्थ्यांनी अधिकृत माहितीवरच विश्वास ठेवावा, असे आवाहन करण्यात आले आहे.
