स्टँड-अप कॉमेडियन समय रैना पुन्हा एकदा चर्चेत आला आहे. यावेळी त्याच्या India’s Got Latent या शोमधील अर्चना पुरण सिंग यांच्यासोबतच्या संवादामुळे सोशल मीडियावर मोठा वाद निर्माण झाला आहे. शोदरम्यान समयने अर्चनाच्या हसण्यावर, त्यांच्या कामावर आणि त्यांच्या कुटुंबावर केलेल्या विनोदांवर अनेक प्रेक्षकांनी नाराजी व्यक्त केली असून, हा विनोद नसून अपमान असल्याची प्रतिक्रिया दिली आहे.
शोमध्ये अर्चना पुरण सिंग विशेष पॅनेलिस्ट म्हणून सहभागी झाल्या होत्या. सुरुवातीला समयने कुछ कुछ होता है चित्रपटातील मिस ब्रॅगांझा ही त्यांची भूमिका आवडत असल्याचे सांगत त्यांचे कौतुक केले. मात्र त्यानंतर त्याने त्यांच्या कौटुंबिक व्लॉग्सचा उल्लेख करत पती परमीत सेठी आणि दोन्ही मुलांबाबत टोमणे मारले.
त्या वेळी अर्चनाचे दोन्ही मुलगे प्रेक्षकांमध्ये समोरच्या रांगेत बसले होते. त्यावर अर्चनाने हसतच, “मी सांगितलं होतं पुढे बसू नका, इथे प्रसिद्धी नाही तर अपमान होतो,” अशी प्रतिक्रिया दिली. त्यानंतरही समयने संवाद पुढे नेत परमीत सेठी यांच्यावरही टिप्पणी केली आणि “घरात फक्त महिला काम करते,” अशा आशयाचा विनोद केला.
अर्चनाने त्याला शांतपणे उत्तर देत, “जगभर महिला काम करतात, पण पुरुष त्याला काम मानत नाहीत,” असे म्हटले. त्यानंतर समयने त्यांच्या कामावरही टोमणा मारत कपिल शर्मा शोमध्ये हसणे हे काम आहे का, असा प्रश्न उपस्थित केला. त्यावर अर्चनाने “हे सर्वात कठीण काम आहे,” असे प्रत्युत्तर दिले.
हा संवाद सोशल मीडियावर व्हायरल झाल्यानंतर अनेक प्रेक्षकांनी समय रैनावर टीका केली. अनेकांच्या मते, विनोद करताना एखाद्याच्या कुटुंबाला लक्ष्य करणे योग्य नाही. काहींनी “हा विनोद नसून अनादर आहे,” अशी प्रतिक्रिया दिली, तर काहींनी वरिष्ठ कलाकारांबद्दल अधिक आदर राखण्याची गरज असल्याचे मत व्यक्त केले.
दरम्यान, परमीत सेठी हे बॉलिवूड आणि दूरचित्रवाणी क्षेत्रातील परिचित अभिनेते आहेत. दिलवाले दुल्हनिया ले जायेंगे, हम आपके दिल में रहते हैं, स्पेशल ऑप्स 1.5 यांसारख्या अनेक चित्रपट आणि मालिकांमध्ये त्यांनी काम केले आहे. अर्चना पुरण सिंग यांनी यापूर्वीही त्यांच्या मुलांनी अभिनय क्षेत्रात स्वतःची ओळख निर्माण करण्यासाठी प्रयत्न सुरू असल्याचे सांगितले होते.
अर्चना पुरण सिंग यांच्या कारकिर्दीबद्दल बोलायचे झाल्यास, त्या नुकत्याच आदर्श बाल विद्यालय या मालिकेत झळकल्या होत्या. या मालिकेला प्रेक्षक आणि समीक्षकांकडून सकारात्मक प्रतिसाद मिळाला असून ती प्राइम व्हिडिओवर उपलब्ध आहे.
समय रैनाच्या या वक्तव्यावर सुरू झालेली चर्चा आता सोशल मीडियावर “कॉमेडीची मर्यादा कुठपर्यंत असावी?” या प्रश्नालाही पुन्हा एकदा केंद्रस्थानी घेऊन आली आहे.
