गेल्या काही दिवसांपासून, व्हॉट्सॲपच्या नवीन 'युजरनेम' (username) वैशिष्ट्याबाबत गोपनीयता, बनावट खाती आणि सायबर फसवणूक यांसारख्या मुद्द्यांवरून चिंता व्यक्त केली जात आहे. मिळालेल्या माहितीनुसार, भारत सरकारही या फिचरबाबत कायदेशीर पर्यायांचा विचार करत आहे.
या पार्श्वभूमीवर, व्हॉट्सॲपने 'X' (पूर्वीचे ट्विटर) या सोशल मीडिया प्लॅटफॉर्मवर एका सविस्तर पोस्टद्वारे या चिंतांचे निरसन केले आहे. कंपनीने स्पष्ट केले आहे की, हे युजरनेम वैशिष्ट्य पूर्णपणे ऐच्छिक असेल आणि वापरकर्त्यांची सुरक्षा व गोपनीयता अबाधित राखण्याच्या उद्देशानेच ते तयार करण्यात आले आहे.
'X' वरील एका पोस्टमध्ये व्हॉट्सॲपने स्पष्ट केले आहे की, कोणासाठीही युजरनेम (username) तयार करणे अनिवार्य असणार नाही. वापरकर्ते पूर्वीप्रमाणेच केवळ त्यांच्या मोबाईल क्रमांकाचा वापर करून हे ॲप वापरणे सुरू ठेवू शकतात. कंपनीने स्पष्ट केले की, युजरनेम आरक्षित करण्याची प्रक्रिया लवकर सुरू करण्यात आली आहे, जेणेकरून हे वैशिष्ट्य (feature) अधिकृतपणे लाँच होण्यापूर्वीच वापरकर्ते त्यांना हवे असलेले युजरनेम सुरक्षित करू शकतील.
सरकारने सूचना जारी करताच, व्हॉट्सॲपने प्रतिसाद दिला. कंपनीच्या प्रवक्त्याने सांगितले, आम्ही लोकांना व्हॉट्सॲपवर त्यांचे पसंतीचे युझरनेम आरक्षित करण्याचा पर्याय जाहीर केला आहे. युझरनेम वापरण्याची सुविधा अद्याप पूर्णपणे उपलब्ध नाही आणि ती या वर्षाच्या अखेरपर्यंत टप्प्याटप्प्याने सुरू केली जाईल.
