कोयंबतूर : कोयंबतूरच्या सुलूर येथे 10 वर्षांच्या मुलीवर झालेल्या लैंगिक अत्याचार आणि हत्येच्या प्रकरणात तामिळनाडू सरकारने केलेल्या हाताळणीवरून एकापाठोपाठ एक दोन वाद निर्माण झाले असून, त्यामुळे नवनिर्वाचित मुख्यमंत्री सी. जोसेफ विजय बॅकफूटवर आले आहेत. सर्वात आधी, तामिळनाडूच्या उद्योगमंत्री एस. कीर्तना या प्रकरणाबद्दल विचारले असता हसताना दिसल्याने, आज सकाळीच भाजपने त्यांच्यावर टीका केली. मात्र, हा वाद इथेच थांबला नाही. त्यानंतर लगेचच, 10 वर्षांच्या मुलीच्या हत्येसंदर्भात आयोजित संयुक्त पत्रकार परिषदेदरम्यान वरिष्ठ पोलीस अधिकारी हसतानाचा आणखी एक व्हिडिओ समोर आला. माध्यमांशी संवाद संपल्यानंतरच आपल्या चेहऱ्यावर हसू आले, असे कीर्तनाने स्पष्ट केले असले तरी, त्यांच्या वर्तणुकीवरून होणाऱ्या टीकेला पोलीस अधिकाऱ्यांनी अद्याप प्रतिसाद दिलेला नाही. ज्यामुळे सोशल मीडियावर संतापाची लाट उसळली आहे. व्हिडिओमध्ये, पश्चिम विभागाच्या पोलीस महानिरीक्षक आर. व्ही. रम्या भारती, कोईम्बतूर रेंजचे डीआयजी पी. समिनाथन आणि कोईम्बतूरचे एसपी अल्लातीपल्ली पवन कुमार रेड्डी यांच्यासोबत संयुक्त पत्रकार परिषदेत प्रश्नोत्तरे सुरू होण्यापूर्वी हसताना आणि बोटे घासताना दिसत आहेत.
या व्हिडीओवर नेटकऱ्यांनी संताप व्यक्त केला असून विविध प्रकारे प्रतिक्रिया दिल्या आहे. एकाने म्हटले आहे की, “ती संपूर्ण वेळ विनाकारण का हसत आहे? अशा अधिकाऱ्यांवर कारवाई करा. गंभीर परिस्थितीत कसे वागावे हे त्यांना माहीत नाही,” तर दुसऱ्याने लिहिले, “एका १० वर्षांच्या मुलाचे अपहरण करून, त्याच्यावर हल्ला करून त्याची हत्या करण्यात आली. आणि किमान संवेदनशीलता दाखवण्याऐवजी, हे अधिकारी पत्रकार परिषदेत विनोद करण्यात अधिक रस दाखवत होते. ही निव्वळ लाजिरवाणी गोष्ट आहे.” तसेच “ती या पदासाठी अयोग्य आहे!!” एका वापरकर्त्याने टिप्पणी केली. तर दुसऱ्या एकाने संतापाने लिहिले, “एक सुसंस्कृत समाज म्हणून आपण सपशेल अपयशी ठरलो आहोत!!” “पोलीस विभागाला लाज वाटायला हवी कारण आपला तामिळनाडू पोलीस विभाग जगातील सर्वोत्तम आहे. पण आज अशा अधिकाऱ्यांमुळे आपण अपयशी ठरतो. आम्ही कारवाईची मनापासून विनंती करतो, साहेब,” दुसऱ्या एका वापरकर्त्याने लिहिले.
