ChatGPT Tips : सध्याच्या काळात जगभरात OpenAI चे ChatGPT हे एक अत्यंत लोकप्रिय माध्यम बनले आहे. मात्र, तुम्ही विचारलेले प्रश्न, दिलेली उत्तरे आणि तुमच्या खासगी आवडीनिवडी यांची माहिती हे चॅटबॉट शांतपणे जतन (Save) करत असते. आपल्या युजर्सच्या संभाषणातून हा AI बॉट स्वतःला अधिक प्रगत बनवण्यासाठी माहितीचा वापर करतो. जर तुम्हाला तुमची गोपनीयता (Privacy) धोक्यात येऊ द्यायची नसेल, तर खालील 5 पद्धतींचा वापर करून तुम्ही स्वतःला सुरक्षित ठेवू शकता.
1. खाते (Account) तयार न करता वापरा
'पीसी मॅग'च्या अहवालानुसार, ChatGPT वापरण्यासाठी आता खाते तयार करण्याची सक्ती नाही. जर तुम्हाला फक्त सामान्य माहिती हवी असेल, तर लॉग इन न करता थेट चॅटिंग सुरू करा. यामुळे तुमच्या संभाषणाचा कोणताही रेकॉर्ड कंपनीकडे राहणार नाही.
2. गुगल किंवा ॲपल खात्याशी लिंक करणे टाळा
अनेकजण घाईघाईत Google, Apple किंवा Microsoft खात्याचा वापर करून साइन-अप करतात. यामुळे तुमची माहिती या कंपन्यांसोबत शेअर केली जाते. त्याऐवजी, एका स्वतंत्र ईमेल पत्त्याचा वापर करून आणि मजबूत पासवर्ड सेट करून नवीन खाते तयार करणे कधीही सुरक्षित ठरते.
हेही वाचा – Supermoon and Meteor Shower : अवकाशात नयनरम्य आतषबाजी! 'सुपरमून' आणि 'उल्कावर्षावा'ने होणार नववर्षाचे स्वागत
3. 'तात्पुरते चॅट' (Temporary Chat) फीचर वापरा
जर तुम्हाला तुमचे संभाषण खाजगी ठेवायचे असेल, तर चॅट विंडोमधील 'तात्पुरते चॅट' बटण निवडा. हा मोड सुरू केल्यावर स्क्रीन काळी होईल, ज्याचा अर्थ असा की हे संभाषण ChatGPT लक्षात ठेवणार नाही किंवा प्रशिक्षणासाठी वापरणार नाही.
4. मेमरी वैशिष्ट्य (Memory Feature) बंद करा
ChatGPT तुमची नोकरी, छंद किंवा कुटुंबातील सदस्यांची माहिती लक्षात ठेवते. हे टाळण्यासाठी 'Settings' मधील 'Personalization' विभागात जाऊन "Manage Memory" किंवा "Referenced Saved Memories" हे पर्याय बंद करा.
5. जुनी माहिती आणि प्रोफाइल तपशील हटवा
प्रोफाइलमधील पर्सनलायझेशन स्क्रीनवर तुम्ही तुमचे टोपणनाव किंवा कामाचे तपशील भरले असल्यास ते तातडीने काढून टाका. जुनी माहिती डिलीट केल्याने ChatGPT ला तुमची वैयक्तिक माहिती वापरण्यापासून रोखता येते. AI तंत्रज्ञानाचा वापर करताना आपली बँक खाती, पासवर्ड किंवा अत्यंत खाजगी माहिती चॅटबॉटवर शेअर करणे टाळावे, जेणेकरून भविष्यातील सायबर धोके टाळता येतील.
