Fixed Deposit Online: गुंतवणुकीच्या पर्यायांचा शोध घेत असाल आणि बँकेत रांगेत उभं राहणं, कागदपत्रांचा त्रास टाळायचा असेल, तर तुमच्यासाठी एक दिलासादायक बातमी आहे. Amazon Pay ने आता फिक्स्ड डिपॉझिट (FD) गुंतवणुकीची नवी डिजिटल सुविधा सुरू केली आहे. या सुविधेमुळे युजर्स थेट Amazon Pay अॅपवरून FD करू शकतात, तेही स्वतंत्र बँक खाते उघडण्याची गरज न पडता.
आजच्या डिजिटल युगात सुरक्षित आणि निश्चित परतावा देणारे गुंतवणूक पर्याय अजूनही अनेकांची पहिली पसंती आहेत. FD हा त्यातीलच एक महत्त्वाचा पर्याय मानला जातो. Amazon Pay ने हीच गरज ओळखून ही सेवा सुरू केली असून, केवळ 1,000 रुपयांपासून गुंतवणूक सुरू करता येते. विशेष म्हणजे या FD वर वार्षिक 8 टक्क्यांपर्यंत व्याजदर मिळू शकतो.
ही FD सेवा Amazon Pay ने विविध स्मॉल फायनान्स बँका, NBFC आणि एका खासगी बँकेसोबत भागीदारी करून सुरू केली आहे. यामुळे युजर्सना वेगवेगळ्या कालावधीचे आणि वेगवेगळ्या व्याजदरांचे FD पर्याय उपलब्ध होतात. युजर्स त्यांच्या आर्थिक गरजेनुसार आणि उद्दिष्टांनुसार योग्य पर्याय निवडू शकतात.
या सुविधेतील मोठा फायदा म्हणजे संपूर्ण प्रक्रिया पूर्णपणे डिजिटल आहे. Amazon Pay अॅप उघडून, Pay सेक्शनमध्ये FD चा पर्याय निवडायचा, अटी व शर्ती स्वीकारायच्या आणि आवडती बँक किंवा NBFC निवडून गुंतवणुकीची रक्कम व कालावधी भरायचा. काही मिनिटांतच FD सुरू होते. कोणताही फॉर्म, शाखेला भेट किंवा अतिरिक्त कागदपत्रांची आवश्यकता नाही.
सुरक्षेच्या दृष्टीनेही ही सेवा महत्त्वाची ठरते. भागीदार बँकांमधील FD वर 5 लाख रुपयांपर्यंतची रक्कम DICGC अंतर्गत संरक्षित असते. हा विमा RBI अंतर्गत असलेल्या डिपॉझिट इन्शुरन्स अँड क्रेडिट गॅरंटी कॉर्पोरेशनकडून दिला जातो. त्यामुळे गुंतवणूकदारांचा विश्वास अधिक मजबूत होतो. काही NBFC भागीदारांकडून महिलांसाठी अतिरिक्त व्याजदराचाही लाभ दिला जात आहे.
Amazon Pay च्या मते, भारतात फिक्स्ड इनकम गुंतवणुकीची मागणी सातत्याने वाढत आहे. 2026 च्या आर्थिक उद्दिष्टांचा विचार करून ही सेवा सुरू करण्यात आली असून, डिजिटल गुंतवणूक अधिक सुलभ करण्यावर कंपनीचा भर आहे.
थोडक्यात सांगायचं झालं तर, सुरक्षितता, सोपेपणा आणि डिजिटल सुविधा यांचा संगम म्हणजे Amazon Pay ची ही FD सेवा. बँकेत न जाता, घरबसल्या, कमी रकमेपासून गुंतवणूक करू इच्छिणाऱ्या युजर्ससाठी हा एक उत्तम पर्याय ठरू शकतो.
