दिल्लीत CJP चं आंदोलन दडपण्याचा प्रयत्न; विमानं, रेल्वे, बसेस अन् रस्त्यांवरून 500 हून अधिक जण ताब्यात
नवी दिल्लीत मुख्य निवडणूक आयुक्त ज्ञानेश कुमार यांच्या विरोधात ‘कॉकरोच जनता पार्टी’ (CJP) आणि विविध विद्यार्थी संघटनांनी पुकारलेले आंदोलन हाणून पाडण्यासाठी दिल्ली पोलिसांनी अत्यंत कडक सुरक्षा पावले उचलली आहेत. राजधानीच्या सीमांपासून ते शहराच्या मध्यवर्ती भागापर्यंत चोख बंदोबस्त ठेवण्यात आला होता. विशेषतः जंतर-मंतर आणि कनॉट प्लेस या संवेदनशील परिसरांमध्ये शनिवार सकाळपासूनच मोठा पोलीस फौजफाटा तैनात करण्यात आला होता. आंदोलनासाठी घराबाहेर पडलेल्या कार्यकर्त्यांना जागोजागी रोखण्यात आले असून, दिवसभरात विविध ठिकाणांहून सुमारे 500 हून अधिक आंदोलकांना पोलिसांनी ताब्यात घेतले आहे.
विमानातच सीजेपी नेत्यांची धरपकड
जंतर-मंतरवरील नियोजित आंदोलनात सहभागी होण्यासाठी ‘CJP’चे राष्ट्रीय अध्यक्ष अभिजित दीपके, प्रवक्ते सौरभ दास आणि आशुतोष रंका हे मुंबईहून विशेष विमानाने दिल्लीत दाखल झाले होते. मात्र, विमान दिल्ली विमानतळावर उतरताच मोठा पोलीस दल विमानात शिरले आणि त्यांनी या तिन्ही प्रमुख नेत्यांना थेट विमानातच ताब्यात घेतले. पोलिसांनी त्यांना खाली उतरू दिली नाही. या कारवाईदरम्यान अभिजित दीपके यांनी प्रसारमाध्यमांशी बोलताना स्पष्ट केले की, ते कोणत्याही भीतीपोटी नाही तर जाणीवपूर्वक अटक करून घेण्यासाठी आले आहेत. त्यानंतर पोलिसांनी त्यांना विमानतळावरूनच पोलीस ठाण्यात नेले.
बॉडी-कॅमेरे आणि ‘पिंक फोर्स’सह पोलीस दल सज्ज
आंदोलनाला तीव्र विरोध दर्शवण्यासाठी दिल्ली पोलिसांनी व्यापक तयारी केली होती. मागील आंदोलनांच्या अनुभवातून सुरक्षेसाठी तैनात असलेल्या अनेक कर्मचाऱ्यांच्या अंगावर ‘बॉडी-वर्न कॅमेरे’ (Body-worn cameras) बसवण्यात आले होते. महिला आंदोलकांना आटोक्यात आणण्यासाठी आणि सुरक्षेसाठी ‘पिंक फोर्स’च्या जवानांनाही प्रमुख चौकांमध्ये तैनात करण्यात आले होते. पोलीस ठाण्यांच्या बाहेर लाऊडस्पीकरवरून ‘भारतीय नागरिक सुरक्षा संहिता’ (BNSS) कलम 163 लागू केल्याची घोषणा सातत्याने केली जात होती. तसेच एनडीएमसी पालिका केंद्राजवळ आणि जंतर-मंतर परिसरातील इमारतींमध्ये कडक पहारा ठेवून ओळखपत्रे तपासल्यानंतरच नागरिकांना सोडले जात होते.
मतदार यादीतील फेरफाराचा गंभीर आरोप
मुख्य निवडणूक आयुक्त ज्ञानेश कुमार यांच्या विरोधात आयोजित या निदर्शनांच्या पार्श्वभूमीवर प्रशासनाने हे अत्यंत कडक निर्बंध लागू केले होते. मतदार यादीच्या ‘विशेष सखोल पुनरावलोकन’ (SIR) प्रक्रियेच्या नावाखाली मतदार यादीत फेरफार केल्याचा, आपल्या सहकाऱ्यांना बाजूला सारल्याचा आणि ‘फॉर्म-6’ च्या नियमांमध्ये बदल केल्याचा गंभीर आरोप ‘CJP’ आणि विरोधी पक्षांनी ज्ञानेश कुमार यांच्यावर लावला आहे. पोलिसांच्या या धडक कारवाईमुळे दिल्लीतील राजकीय वातावरण चांगलेच तापले असून, लोकशाही मार्गाने निदर्शने करण्याच्या अधिकारावर मर्यादा आणल्या जात असल्याचा आरोप आंदोलकांनी केला आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.