Karnataka DGP Scandal : कर्नाटक पोलीस दलातील एका वरिष्ठ आयपीएस अधिकाऱ्याच्या अश्लील व्हिडिओ क्लिप्स सोशल मीडियावर व्हायरल झाल्याने संपूर्ण देशात खळबळ उडाली आहे. या प्रकरणी राज्य सरकारने तत्काळ पावले उचलत पोलीस महासंचालक (नागरिक हक्क अंमलबजावणी) के. रामचंद्र राव यांना निलंबित केले आहे. या धक्कादायक प्रकारामुळे पोलीस प्रशासनाच्या प्रतिमेवर प्रश्नचिन्ह निर्माण झाले असून, राजकीय वर्तुळातही आरोप-प्रत्यारोपांच्या फैरी झाडल्या जात आहेत.
नेमके प्रकरण काय?
सोमवारी सोशल मीडियावर काही व्हिडिओ क्लिप्स व्हायरल झाल्या, ज्यामध्ये वरिष्ठ पोलीस अधिकारी के. रामचंद्र राव हे विविध महिलांसोबत आक्षेपार्ह अवस्थेत दिसत असल्याचा दावा करण्यात आला आहे. हे व्हिडिओ समोर येताच कर्नाटक सरकार आणि पोलीस दलात मोठी खळबळ उडाली. या क्लिप्समधील दृश्ये अत्यंत आक्षेपार्ह असल्याने आणि एका वरिष्ठ अधिकाऱ्याचे नाव यात गुंफले गेल्याने, प्रशासनाने या प्रकरणाचे गांभीर्य लक्षात घेऊन राव यांच्यावर निलंबनाची कारवाई केली आहे.
'माझी प्रतिमा मलिन करण्याचा कट' - रामचंद्र राव यांचा दावा
व्हिडिओ व्हायरल झाल्यानंतर रामचंद्र राव यांनी आपली बाजू मांडण्यासाठी कर्नाटकचे गृहमंत्री जी. परमेश्वर यांची भेट घेण्याचा प्रयत्न केला, परंतु ही भेट होऊ शकली नाही. प्रसारमाध्यमांशी बोलताना राव यांनी स्वतःवरील सर्व आरोप फेटाळून लावले आहेत. ते म्हणाले:
"या व्हायरल व्हिडिओ क्लिप्समुळे मला मोठा धक्का बसला आहे, माझा याच्याशी कोणताही संबंध नाही. आजच्या काळात कोणाचाही बनावट (Fake) व्हिडिओ तयार करणे शक्य आहे. हा माझी प्रतिमा मलिन करण्याचा कट असू शकतो." जेव्हा त्यांना विचारण्यात आले की हे व्हिडिओ जुने आहेत का, तेव्हा त्यांनी सांगितले की, "जर हे व्हिडिओ जुने असतील, तर ते किमान 8 वर्षे जुने असावेत जेव्हा मी बेळगावी येथे तैनात होतो."
हेही वाचा - Jaipur Audi Accident : 16 जणांना चिरडणारा ऑडी कारचालक अखेर पोलिसांच्या तावडीत; 10 दिवसांनंतर आरोपी अटकेत
भाजपचा काँग्रेस सरकारवर हल्लाबोल
या प्रकरणावरून कर्नाटकातील मुख्य विरोधी पक्ष भाजप आक्रमक झाला आहे. भाजप प्रवक्ते शहजाद पूनावाला यांनी काँग्रेस सरकारवर टीका करताना म्हटले की, काँग्रेसच्या राजवटीत कर्नाटकातील कायदा आणि सुव्यवस्था कोलमडली आहे. जर एका वरिष्ठ पोलीस अधिकाऱ्याच्या कार्यालयात किंवा त्याच्याशी संबंधित अशा गोष्टी घडत असतील, तर राज्यातील महिलांच्या सुरक्षिततेचे काय? असा सवाल त्यांनी उपस्थित केला आहे. महिलांच्या सुरक्षेच्या बाबतीत कर्नाटक नीचांकी पातळीवर पोहोचल्याचा आरोपही भाजपने केला आहे.
मुख्यमंत्री सिद्धरामय्या यांचे चौकशीचे आदेश
राज्याचे मुख्यमंत्री सिद्धरामय्या यांनी या प्रकरणाची गंभीर दखल घेतली असून सखोल तपासाचे आदेश दिले आहेत. "कोणीही कायद्यापेक्षा मोठा नाही, मग तो कितीही मोठ्या पदावरचा अधिकारी का असेना," अशा कडक शब्दांत मुख्यमंत्र्यांनी आपली भूमिका स्पष्ट केली आहे. या प्रकरणाचा सविस्तर चौकशी अहवाल प्राप्त झाल्यानंतर रामचंद्र राव यांच्यावर पुढील कायदेशीर कारवाई केली जाणार आहे. सध्या पोलीस प्रशासन या व्हिडिओची सत्यता पडताळण्यासाठी सायबर तज्ज्ञांची मदत घेत आहे.
हेही वाचा - Crime News : नको त्या अवस्थेत बायको दोन मुलांसोबत बेडवर, नवऱ्याने समोर पाहिलं आणि...
रामचंद्र राव यांची सावत्र मुलगी रान्या हिचे सोने तस्करी प्रकरण
आयपीएस अधिकारी रामचंद्र राव हे कन्नड अभिनेत्री हर्षवर्धन रान्या ऊर्फ रान्या राव हिचे सावत्र वडील आहेत. रान्या राववर दुबईतून भारतात सुमारे 12.56 कोटी रुपयांच्या सोन्याची बेकायदेशीर आयात करण्याचा कट रचल्याचा गंभीर आरोप आहे. या तस्करी प्रकरणात तिच्यासोबत उद्योगपती तरुण राजू आणि ज्वेलरी डीलर साहिल जैन यांचाही समावेश असल्याचे समोर आले आहे. या हाय-प्रोफाईल सोन्याच्या तस्करी प्रकरणामुळे रामचंद्र राव यांची कारकीर्द आधीच वादात सापडली होती. आता त्यांच्या अडचणींमध्ये आणखी वाढ झाली आहे.