मुंबई: बॉलीवूड अभिनेते राजपाल यादव हे दीर्घकाळ प्रलंबित असलेल्या धनादेश फसवणूक (चेक बाउन्स) प्रकरणात सध्या तिहार कारागृहात आहेत. त्यांच्या जामीन अर्जावर दिल्ली उच्च न्यायालयात गुरुवारी सुनावणी झाली होती, मात्र न्यायालयाने त्यांना तत्काळ दिलासा देण्यास स्पष्ट नकार दिला. शाहजहांपूर येथे 19 फेब्रुवारी रोजी होणाऱ्या पुतणीच्या विवाहसमारंभाला उपस्थित राहता यावे, या कारणासाठी त्यांनी तात्पुरत्या जामिनाची विनंती केली होती. आता या प्रकरणातील पुढील सुनावणी आज, 16 फेब्रुवारी रोजी होणार असल्याने चाहत्यांचे लक्ष न्यायालयाच्या निर्णयाकडे लागले आहे.
या प्रकरणाची पार्श्वभूमी 2010 सालापर्यंत पोहोचते. दिग्दर्शक म्हणून त्यांनी ‘अता-पता लापता’ हा चित्रपट निर्मिती केला होता. या चित्रपटासाठी ‘मेसर्स मुरली प्रोजेक्ट्स प्रायव्हेट लिमिटेड’कडून सुमारे पाच कोटी रुपयांचे कर्ज घेण्यात आले होते. चित्रपटाला अपेक्षित आर्थिक यश न मिळाल्याने परतफेडीत विलंब झाला आणि संबंधित धनादेश खोटे ठरले.
यानंतर त्यांच्या विरोधात लेखपत्र कायदा, 1881 च्या कलम 138 अंतर्गत गुन्हा दाखल करण्यात आला. न्यायालयाने वारंवार संधी दिल्यानंतरही थकबाकी न भरल्यामुळे त्यांना नोटीस बजावण्यात आली आणि 4 फेब्रुवारी रोजी आत्मसमर्पण करण्याचे आदेश देण्यात आले होते.
दरम्यान, सामाजिक माध्यमांवर व्हायरल झालेल्या काही व्हिडिओंमुळे ते कारागृहातून मुक्त झाल्याच्या चर्चा रंगल्या होत्या. मात्र त्यांच्या पत्नी राधा यादव यांनी ‘बॉम्बे टाइम्स’ला दिलेल्या मुलाखतीत या बातम्या अफवा असल्याचे स्पष्ट केले. त्यांनी सांगितले की, सध्या ते तिहार कारागृहातून बाहेर आलेले नाहीत आणि 16 फेब्रुवारी रोजी त्यांच्या जामीन अर्जावर सुनावणी होणार आहे.
राधा यादव यांनी पुढे सांगितले की, “ते ठीक आहेत. आमचे संपूर्ण कुटुंब एकत्र आहे. चाहत्यांकडून आणि चित्रपटसृष्टीतून मिळणाऱ्या पाठिंब्याबद्दल आम्ही मनःपूर्वक कृतज्ञ आहोत.” आता न्यायालयाचा पुढील निर्णय काय येतो, याकडे सर्वांचे लक्ष लागले असून, त्यांना जामीन मिळणार की नाही याबाबत उत्सुकता शिगेला पोहोचली आहे.
