David J Farber Death: आधुनिक इंटरनेटचा पाया रचणाऱ्या महान शास्त्रज्ञांपैकी एक आणि 'इंटरनेटचे जनक' म्हणून ओळखले जाणारे डेव्हिड जे. फार्बर यांचे जपानमधील टोकियो येथे निधन झाले. वयाच्या 91व्या वर्षी त्यांनी अखेरचा श्वास घेतला. त्यांचे पुत्र इमॅन्युएल फार्बर यांनी दिलेल्या माहितीनुसार, हृदयविकाराच्या झटक्याने त्यांचे निधन झाले आहे. 2018 पासून ते जपानमधील केओ विद्यापीठात अध्यापन करत होते. संगणकीय प्रणाली आणि दूरसंवाद (Telecommunications) यांना एकत्र जोडण्याच्या त्यांच्या ऐतिहासिक कार्यासाठी जग त्यांना सदैव स्मरणात ठेवेल.
नेटवर्किंग क्षेत्रातील सुरुवातीचे शिल्पकार
डेव्हिड जे. फार्बर यांनी 1950 च्या दशकात प्रसिद्ध बेल लॅबोरेटरीजमधून आपल्या कारकिर्दीची सुरुवात केली. त्यावेळी संगणक हे केवळ आकडेमोडीचे साधन मानले जात होते, मात्र फार्बर यांच्या संशोधनामुळे संगणकीय क्षेत्र 'नेटवर्क कम्युनिकेशन'कडे वळण्यास मदत झाली. न्यू यॉर्क टाईम्सने त्यांचे वर्णन तंत्रज्ञान क्षेत्रातील सुरुवातीचे 'शिल्पकार' म्हणून केले आहे. संगणक हे केवळ गणना करण्याचे यंत्र नसून ते मानवांशी संवाद साधणारी एक शक्तिशाली प्रणाली बनू शकते, हा विचार त्यांनी जगासमोर मांडला.
इंटरनेट आणि DNS च्या निर्मितीत मोलाचे योगदान
प्रयोगशाळेतील संशोधनानंतर फार्बर यांनी अध्यापन क्षेत्रात प्रवेश केला आणि अनेक प्रतिभावान विद्यार्थ्यांना मार्गदर्शन केले. 1970 च्या दशकात त्यांनी त्यांचे विद्यार्थी जोनाथन पोस्टेल यांच्यासोबत संवादाचे प्रारंभिक नियम तयार केले, जे इंटरनेटच्या विकासाचा आधार ठरले. इतकेच नव्हे तर, त्यांच्या मार्गदर्शनाखाली त्यांचे दुसरे विद्यार्थी पॉल मोकापेट्रिस यांनी डोमेन नेम सिस्टम (DNS) डिझाइन केली. आज आपण ज्या .com किंवा .org सारख्या नावांनी वेबसाईट ओळखतो, त्यामागे फार्बर आणि त्यांच्या टीमचे मोठे परिश्रम आहेत.
ईमेलची भविष्यवाणी आणि भविष्यवेधी दृष्टिकोन
दरम्यान, 1977 मध्ये डेव्हिड जे. फार्बर यांनी अभियंता पॉल बारन यांच्यासोबत एक शोधनिबंध (Research Paper) लिहिला होता. या पेपरमध्ये त्यांनी संगणकांच्या अफाट क्षमतेचे वर्णन केले होते. आश्चर्याची बाब म्हणजे, अनेक दशकांपूर्वीच त्यांनी ईमेल आणि इतर डिजिटल साधनांच्या आगमनाची अचूक भविष्यवाणी केली होती, जी आजच्या काळात सत्यात उतरली आहे. त्यांच्या संशोधनाने जागतिक इंटरनेट प्रणालीला एक नवी दिशा दिली, ज्यामुळे आज जग एकमेकांशी सेकंदात जोडले गेले आहे.
