Sourav Ganguly Biopic: भारतीय क्रिकेट विश्वातील अत्यंत यशस्वी आणि आक्रमक कर्णधार म्हणून ओळखल्या जाणाऱ्या सौरव गांगुली यांचा जीवनप्रवास आता चंदेरी पडद्यावर उलगडणार आहे. ‘दादा: द सौरव गांगुली स्टोरी’ (Dada: The Sourav Ganguly Story) या बहुप्रतिक्षित चित्रपटाच्या चित्रीकरणाला अभिनेता राजकुमार राव याने अधिकृतपणे सुरुवात केली आहे. बुधवारी सोशल मीडियावर एक पोस्ट शेअर करत त्याने या मोठ्या प्रकल्पाची घोषणा केली असून, या चित्रपटामुळे क्रिकेट आणि चित्रपट प्रेमींमध्ये मोठी उत्सुकता निर्माण झाली आहे.
विक्रमादित्य मोटवाने करणार दिग्दर्शन; राजकुमारचा नवा लूक चर्चेत
या चित्रपटाचे दिग्दर्शन ‘उडान’ आणि ‘ज्युबिली’ फेम दिग्दर्शक विक्रमादित्य मोटवाने करत आहेत. या भूमिकेसाठी राजकुमार रावने प्रचंड मेहनत घेतली असून त्याचे ‘फिजिकल ट्रान्सफॉर्मेशन’ सध्या चर्चेचा विषय ठरत आहे. फेब्रुवारी महिन्यात राजकुमार एका वेगळ्याच रूपात दिसल्याने चाहत्यांना काळजी वाटली होती; मात्र, त्याने स्पष्ट केले की गांगुली यांच्या भूमिकेत शिरण्यासाठी त्याने आपले वजन 9 ते 10 किलोने वाढवले होते. आता हे वजन कमी करून प्रत्यक्ष ‘दादा’च्या शरीरयष्टीमध्ये स्वतःला सामावून घेण्याचा पुढचा टप्पा त्याने सुरू केला आहे.
भूमिकेसाठी पिझ्झा, बिर्याणी आणि पराठ्यांचा आहार
आपल्या भूमिकेसाठी राजकुमारने कोणत्याही ग्लॅमरस स्टाईलिंगचा वापर न करता नैसर्गिक दिसण्यावर भर दिला आहे. “मला वजन वाढवण्यासाठी दोन पिझ्झा, भरपूर गोड पदार्थ, आलू पराठे आणि बिर्याणी खावी लागली,” असे त्याने आपल्या इन्स्टाग्राम पोस्टमध्ये नमूद केले. वाढवलेले वजन आता कमी करून गांगुली यांच्या तरुणपणातील आणि क्रिकेट कारकिर्दीतील लूक मिळवण्यासाठी राजकुमार सध्या कठोर परिश्रम घेत आहे. लव रंजन आणि अंकुर गर्ग या चित्रपटाची निर्मिती करत आहेत.
धोनी आणि कपिल देव यांच्यानंतर आता ‘दादा’ची बारी
क्रिकेटपटूंच्या आयुष्यावर आधारित चित्रपटांची बॉलीवूडमध्ये मोठी क्रेझ आहे. यापूर्वी सुशांत सिंग राजपूतने साकारलेला ‘एम.एस. धोनी: द अनटोल्ड स्टोरी’ प्रचंड गाजला होता. तसेच कपिल देव यांच्या 1983 च्या विश्वचषक विजयावर आधारित ’83’ चित्रपटात रणवीर सिंगने मुख्य भूमिका साकारली होती. आता सौरव गांगुली यांचा लॉर्ड्सच्या बाल्कनीतील तो ऐतिहासिक शर्ट काढण्याचा क्षण असो वा त्यांचा भारतीय क्रिकेटला नवी दिशा देण्याचा प्रवास, हे सर्व अनुभवण्यासाठी प्रेक्षक आतुर झाले आहेत.
