वायनाड : वायनाड जिल्ह्यातील मेप्पाडीजवळील कल्लाडी येथे सुरू असलेल्या जुळ्या बोगद्यांच्या (ट्विन टनेल) प्रकल्पाच्या ठिकाणी मंगळवार, 7 जुलै 2026 रोजी दरड कोसळण्याची घटना घडली. केरळच्या वायनाड जिल्ह्यात बोगद्याच्या रस्त्याचे काम सुरू असताना झालेल्या दरडीच्या कोसळण्याच्या घटनेत तिघांचा मृत्यू झाला असून, बेपत्ता असलेल्या पाच जणांचा शोध घेण्याची मोहीम बुधवारी दुसऱ्या दिवशीही सुरू आहे. दरम्यान, पोलिसांनी अपघाती मृत्यूची नोंद करून या घटनेचा तपास सुरू केला आहे.
वायनाडचे पोलीस अधीक्षक देवमनोहर यांनी सांगितले की, दरड कोसळण्याच्या घटनेसंदर्भात अपघाती मृत्यूची नोंद करण्यात आली असून तपास सुरू आहे. त्यांनी सांगितले की, शोध मोहिमेसाठी श्वानपथक (कॅडाव्हर डॉग्ज), अग्निशमन व बचाव दलाचे जवान आणि राष्ट्रीय आपत्ती प्रतिसाद दलाची (NDRF) पथके तैनात करण्यात आली आहेत. बाधित क्षेत्राची चार विभागांमध्ये (सेक्टर्समध्ये) विभागणी करण्यात आली असून, नदीच्या प्रवाहाच्या दिशेने खालच्या भागातही शोध घेतला जात आहे.
केरळचे मुख्यमंत्री व्ही. डी. सतीसन यांनी बुधवारी सांगितले की, या दुर्घटनेमागील कारणे शोधण्यासाठी सरकार सखोल तपासणी करेल. बोगद्याच्या प्रकल्पाला पर्यावरणविषयक मंजुरी देताना केंद्र सरकारने दिलेल्या सूचनांचे बांधकाम कंपनीने पालन केले आहे की नाही, याचीही तपासणी केली जाईल, असे मुख्यमंत्र्यांनी सांगितले. वायनाडला कोझिकोडशी जोडणाऱ्या या बोगद्याचे काम या दोन तपासण्या पूर्ण झाल्यानंतरच पुन्हा सुरू केले जाईल, असे सतीसन यांनी येथे घेतलेल्या पत्रकार परिषदेत सांगितले.
भूस्खलनाशी संबंधित अहवालांचा आढावा घेतल्यानंतर, सकाळी त्यांच्या अध्यक्षतेखाली झालेल्या मंत्रिमंडळाच्या बैठकीत ही तपासणी करण्याचा निर्णय घेण्यात आल्याचे त्यांनी सांगितले.मुख्यमंत्री म्हणाले की, या घटनेची कारणे शोधण्यासाठी आवश्यक असलेली सर्व कायदेशीर आणि तांत्रिक पावले उचलण्याचा निर्णयही मंत्रिमंडळाने घेतला आहे. बांधकाम सुरू असलेल्या ठिकाणाच्या वरच्या बाजूला दरड कोसळल्याचे वृत्त असल्याचे त्यांनी सांगितले. “आम्ही त्याचीही तपासणी करू,” असे ते म्हणाले.
STORY | Wayanad landslide: Search on for five missing; unnatural death case registered, says police A day after a landslide at the tunnel road construction site in this hill district claimed three lives, extensive search operations are ongoing to find five people who are still… pic.twitter.com/jPlp6poRMF — Press Trust of India (@PTI_News) July 8, 2026
जिल्हा प्रशासन आणि सार्वजनिक बांधकाम मंत्री पी. के. बशीर यांच्या सूचना असूनही बांधकामस्थळी साचलेली माती हटवण्यात आली नव्हती, असा आरोप करत राज्य सरकारने मंगळवारी या घटनेचे वर्णन ‘मानवनिर्मित आपत्ती’ असे केले. बांधकाम कंपनीच्या महाव्यवस्थापकांनी हा आरोप फेटाळून लावला आणि दावा केला की, दरड कोसळण्याची घटना प्रत्यक्ष कामाच्या ठिकाणापासून बऱ्याच वरच्या भागात घडली होती. त्यांनी सांगितले की, ही घटना कंपनीला बांधकामासाठी दिलेल्या जागेवर घडली नाही आणि तिथे साचलेली माती या आपत्तीचे कारण नव्हती.
दरम्यान, बचावकार्यात सहभागी असलेल्या एका अधिकाऱ्याने सांगितले की, जरी दरड बांधकामस्थळाच्या वरच्या भागात कोसळली असली, तरी त्या परिसरात साचलेल्या मातीमुळे मातीच्या प्रवाहाची (मडस्लाईडची) तीव्रता वाढली. तसेच, सुरू असलेल्या पावसामुळे शोध आणि बचावकार्यात अडथळे येत असल्याचेही त्यांनी नमूद केले. या घटनेत मृत्यू झालेल्या तिघांची ओळख पटली असून मध्य प्रदेशातील मशीन ऑपरेटर चंद्रभान, बिहारमधील सिव्हिल फोरमॅन विकास कुमार आणि झारखंडमधील कामगार अनमोल हे तिघेही स्थलांतरित कामगार असल्याचे समजते. मंगळवार रात्रीपर्यंत सात जखमींवर मेप्पाडी येथील विम्स (WIMS) रुग्णालयात उपचार सुरू होते.
