Winter Skincare: हिवाळा सुरु झाला की त्वचेशी संबंधित समस्या आपोआप वाढतात. सकाळच्या थंड वाऱ्यासोबतच त्वचेचा कोरडेपणा, ओलावा कमी होणे आणि चेहऱ्याचा निस्तेजपणा जाणवू लागतो. अशा वेळी अनेक जण महागडे स्किन प्रॉडक्ट्स वापरतात, पण खरा उपाय तुमच्या आहारात दडलेला असतो. सौंदर्यतज्ञांच्या मते, दररोजच्या आहारात जर तुम्ही खजूर समाविष्ट केला, तर त्वचा नैसर्गिकरित्या मऊ, सतेज आणि निरोगी राहते.
खजूरमध्ये दडलेले त्वचेसाठी फायदेशीर घटक
खजूर हे फक्त उर्जेचं उत्तम स्रोत नाही तर त्वचेला पोषण देणारा खाद्यपदार्थ आहे. यात व्हिटॅमिन A, C, D, E सोबत आयर्न, झिंक, मॅग्नेशियम आणि कॅल्शियम सारखे घटक मुबलक प्रमाणात असतात. हे सर्व घटक त्वचेला हायड्रेशन देतात, कोरडेपणा कमी करतात आणि पेशींना पुनरुज्जीवित करतात. खजूरमधील अँटिऑक्सिडंट्स फ्री रॅडिकल्स दूर करून त्वचेचा निस्तेजपणा कमी करतात.
त्वचेला मिळणारे फायदे
हिवाळ्यात वातावरणातील आर्द्रता कमी झाल्याने त्वचा कोरडी पडते. खजूरमधील नैसर्गिक साखर आणि पोटॅशियम शरीरातील वॉटर बॅलन्स टिकवून ठेवतात, ज्यामुळे त्वचा मऊ आणि तजेलदार दिसते. तसेच खजूरमध्ये असलेले व्हिटॅमिन C डेड स्किन काढून टाकण्यास मदत करते, ज्यामुळे चेहऱ्यावर नैसर्गिक ग्लो दिसून येतो.
नियमित सेवनामुळे त्वचेवरील बारीक सुरकुत्या कमी होतात आणि डाग-धब्ब्यांवरही परिणाम दिसतो. त्यामुळे स्किन ग्लो करण्यासाठी बाजारातील केमिकलयुक्त प्रॉडक्ट्स वापरण्याची गरज उरत नाही.
खजूर खाण्याची योग्य वेळ आणि पद्धत
सौंदर्यतज्ञांच्या मते, दररोज सकाळी 3 ते 5 खजूर कोमट दुधात भिजवून खाल्ल्यास त्यातील पोषक घटक शरीरात लवकर शोषले जातात आणि त्वचेवर त्वरित परिणाम दिसतो.
हिवाळ्यात खजूर, बदाम आणि तूप यांचे लाडू बनवून दिवसातून एक खाणे हा देखील उत्तम पर्याय आहे. हे लाडू केवळ त्वचेसाठी नव्हे तर रोगप्रतिकारक शक्ती वाढवण्यासाठी देखील उपयोगी ठरतात.
हेही वाचा: Winter Skin Care: हिवाळ्यात गाईचे तूप ठरेल वरदान! त्वचा राहील मऊ, चेहरा होईल तजेलदार
अति सेवन टाळा
खजूर पौष्टिक असला तरी त्यात नैसर्गिक साखर जास्त प्रमाणात असते. त्यामुळे दिवसाला 5 पेक्षा जास्त खजूर खाणं टाळावं. जास्त खाल्ल्यास रक्तातील साखरेचं प्रमाण वाढू शकतं. मधुमेह असलेल्या व्यक्तींनी मात्र डॉक्टरांचा सल्ला घेऊनच खजूर सेवन करावं.
हिवाळ्यात त्वचेची काळजी घेण्यासाठी महागड्या क्रीम्स आणि फेस मास्कची गरज नाही. आहारात फक्त काही खजूर समाविष्ट करा आणि पाहा, काही दिवसांतच त्वचा नैसर्गिक तेजाने उजळून निघेल. निरोगी, मऊ आणि ग्लोइंग त्वचेसाठी ‘खजूर’ हा खरा नैसर्गिक स्किनकेअर उपाय आहे.
