नवी मुंबई : पर्यावरणपूरक इलेक्ट्रिक वाहनांना प्रोत्साहन देण्यासाठी नवी मुंबई महापालिकेने प्रत्येक विभागात चार्जिंग स्टेशन सुरू करण्याचा निर्णय घेतला आहे. परिवहन विभागाच्या माध्यमातून ऐरोली ते सीबीडी दरम्यान १३ ठिकाणी स्टेशन तयार केली जाणार असून, सर्वाधिक पाच स्टेशन नेरूळ विभागात असणार आहेत. नवी मुंबईमध्येही इलेक्ट्रिक वाहनांची संख्या वाढू लागली आहे. पेट्रोल व डिझेलपासून होणारे प्रदूषण टाळण्यासाठी ई-वाहने खरेदी करण्यास पसंती दिली जात असून, यामध्ये दुचाकीसह कारचाही समावेश आहे.
