Pineapple Pickle Recipe: भारतीय स्वयंपाकात लोणच्याला एक खास स्थान आहे. जेवणात थोडंसं लोणचं असलं की चवीला एक वेगळीच उंची मिळते. पारंपरिक आंबा, लिंबू किंवा मिरचीच्या लोणच्यांबरोबरच आता विविध फळांपासूनही लोणचं बनवण्याचा ट्रेंड वाढत आहे. त्यापैकीच एक वेगळा आणि चविष्ट पर्याय म्हणजे अननसाचं लोणचं.
अननस लोणचं हे गोड, आंबट आणि तिखट अशा तिन्ही चवींचं सुंदर मिश्रण आहे. ज्यांना काहीतरी वेगळं आणि हटके खायचं आहे, त्यांच्यासाठी हा पदार्थ उत्तम पर्याय ठरतो. विशेष म्हणजे, हे लोणचं बनवणं अतिशय सोपं असून कमी वेळात तयार होतं.
अननस लोणच्यासाठी लागणारे साहित्य:
अननस- 2 कप (लहान तुकडे केलेले)
साखर किंवा गूळ- 1 कप (चवीनुसार)
व्हिनेगर किंवा लिंबाचा रस- 2 ते 3 टेबलस्पून
मीठ- चवीनुसार
लाल तिखट- 1 ते 2 टीस्पून
बनवण्याची पद्धत:
सर्वप्रथम ताजं अननस स्वच्छ करून त्याचे लहान-लहान तुकडे करा. एका भांड्यात हे तुकडे घ्या. त्यात साखर किंवा गूळ घालून हलक्या हाताने मिसळा. त्यानंतर त्यात व्हिनेगर किंवा लिंबाचा रस, मीठ आणि लाल तिखट घालून मिश्रण एकजीव करा.
आता हे तयार मिश्रण मंद आचेवर गॅसवर ठेवा. सुमारे १० मिनिटं हे मिश्रण शिजू द्या. या प्रक्रियेमुळे अननस मऊ होतो आणि त्यात मसाल्यांची चव चांगली मुरते. शिजवताना अधूनमधून हलवत राहा, जेणेकरून मिश्रण खाली लागू नये.
मिश्रण व्यवस्थित शिजल्यानंतर गॅस बंद करा आणि ते पूर्णपणे थंड होऊ द्या. थंड झाल्यावर हे लोणचं स्वच्छ आणि कोरड्या काचेच्या बरणीत भरून ठेवा. चव अधिक मुरण्यासाठी हे लोणचं किमान २४ तास तसेच ठेवणं फायदेशीर ठरतं.
साठवण आणि वापर:
हे लोणचं तुम्ही फ्रिजमध्ये ठेवून सुमारे आठवडाभर वापरू शकता. रोजच्या जेवणासोबत तोंडी लावण्यासाठी किंवा खास पदार्थांसोबतही हे उत्तम लागते. विशेषतः रोटी, पराठा, भात किंवा अगदी स्नॅक्ससोबतही याची चव खुलते. अननस लोणचं हे केवळ चवीसाठीच नाही, तर त्यातील घटकांमुळे आरोग्यासाठीही फायदेशीर ठरू शकतं. अननसामध्ये असलेले पोषक घटक पचनासाठी मदत करतात, तर गुळामुळे शरीराला ऊर्जा मिळते.
