जळगावच्या उमाळा फाट्याजवळ भीषण अपघात; शाळकरी मुलांना नेणारे छोटा हत्ती वाहन पलट्याने 8 ते 10 विद्यार्थी जखमी

जळगाव : जळगावजवळील उमाळा फाट्याजवळ शाळकरी विद्यार्थ्यांना घेऊन जाणाऱ्या छोटा हत्ती वाहनाचा भीषण अपघात झाला. या अपघातात आठ ते दहा विद्यार्थी जखमी झाले असून, त्यापैकी दोन विद्यार्थ्यांची प्रकृती गंभीर असल्याची प्राथमिक माहिती आहे. शाळा सुटल्यानंतर आठवी, नववी आणि दहावीतील विद्यार्थी बसची वाट पाहत होते. त्याचवेळी समोरून आलेल्या छोटा हत्ती वाहनाला हात दाखवून विद्यार्थी कंडारी येथे जाण्यासाठी त्यात बसले. मात्र, काही अंतरावरच वाहनाचा अपघात होऊन ते पलटी झाल्याची प्राथमिक माहिती आहे. सर्व जखमी विद्यार्थ्यांवर जळगावच्या शासकीय वैद्यकीय महाविद्यालय व रुग्णालयात उपचार सुरू आहेत. अपघाताची माहिती मिळताच पालकांनी रुग्णालयात धाव घेतली. आपल्या मुलांच्या प्रकृतीची चिंता असल्याने अनेक महिला पालकांना अश्रू अनावर झाले.

हेही वाचा : मोठ्या प्रमाणात ‘लक्ष्मी दर्शन’ झाल्याने पराभव; सोमेश्वर कारखाना निवडणुकीत बंडखोर पुरुषोत्तम जगताप यांचा थेट आरोप