नाशिक: नाशिक जिल्ह्यातील देवळा तालुक्यात देवळा-मालेगाव मार्गावर झालेल्या भीषण अपघातात मोटारसायकलवरील दोन जणांचा जागीच मृत्यू झाला. पिंपळगाव वाखरी शिवारात गुरुवारी सायंकाळच्या सुमारास हा अपघात झाला. अपघातानंतर इर्टिगा कारचा चालक वाहन घटनास्थळीच सोडून फरार झाल्याची माहिती समोर आली आहे. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, देवळा-मालेगाव रोडवरील पिंपळगाव-वाखरी शिवारात सायंकाळी सुमारे सहा वाजता हा अपघात झाला. देवळा तालुक्यातील दहिवड येथील रहिवासी देविदास पांडुरंग ठाकरे (वय 26 ) आणि कैलाश पुंडलिक देवरे (वय 55) हे दोघे मोटारसायकलवरून दहिवडच्या दिशेने देवळ्याकडे जात होते.
त्याचवेळी देवळ्याकडून दहिवडकडे जाणाऱ्या इर्टिगा कारशी त्यांच्या दुचाकीची समोरासमोर जोरदार धडक झाली. धडक इतकी भीषण होती की मोटारसायकलवरील दोन्ही प्रवासी गंभीर जखमी झाले. मात्र, त्यांचा घटनास्थळीच मृत्यू झाल्याचे प्राथमिक माहितीतून समोर आले आहे.
अपघातानंतर कारचालकाने घटनास्थळी थांबण्याऐवजी वाहन तिथेच सोडून पळ काढल्याचे सांगण्यात येत आहे. त्यामुळे अपघाताची माहिती मिळताच देवळा पोलिसांनी तातडीने घटनास्थळी धाव घेतली. पोलीस निरीक्षक सार्थक नेहेते यांच्या मार्गदर्शनाखाली पोलिसांनी घटनास्थळाचा पंचनामा केला.
दोन्ही मृतदेह पुढील वैद्यकीय प्रक्रियेसाठी देवळा ग्रामीण रुग्णालयात हलवण्यात आले आहेत. दरम्यान, अपघातानंतर फरार झालेल्या इर्टिगा चालकाचा शोध घेण्याचे काम पोलिसांकडून सुरू आहे. अपघात नेमका कोणत्या कारणामुळे झाला, याचाही तपास केला जात आहे.
